Yesu ejile hano hamavu nakwambulula mujimbu wamwaza waWangana waKalunga. Yehova ahanyine Yesu shipilitu yajila mangana alinge vyuma vyakukomwesa, nakusolola nge Yesu mwakalingila vatu vyuma vyamwaza kulutwe hakupwa Mwangana. Yesu okilenga vaveji, kweshokwo ayilenga vatu vaze vapwilenga nakuviza vejilenga kuli ikiye mangana avakafwe, kaha avokilenga vosena. Tupuputa avatonesele, natujika matwitwi vaputukile kwivwa, navitonji vaputukile kutambuka, vaka-vandemone nawa avafumishilengavo. Kaha nawa vatu vaze vakwachilenga kuuvwalo wenyi vahindukile kumisongo yavo. Ngocho, vatu vakavangijilenga Yesu kweshokwo ayilenga. Numba tuhu lwola lumwe asakilenga kupwa ukawenyi, oloze vatu vamukavilenga, ikiye nawa kavahangilengako.

Lwola lumwe, vatu vatwalile lunga uze apwile nakuviza musongo wakalepa kuzuvo atwaminenga Yesu. Oloze muzuvo kana mwapwile vatu vavavulu, kahechi chalingishile vaze vanehele uze muka-kalepa vahone kwingila mukachi. Jino vatuvile hamulungu wazuvo nakwingisa uze muka-kalepa mukachi. Ngocho Yesu alwezele uze lunga ngwenyi: ‘Katuka uyenga.’ Omu vatu vamwene uze lunga nakatuka, valikomokelele chikuma.

Lwola lumwe, omu Yesu engilile mungalila yimwe, malunga 10 vaka-mbumba vaze vapwile hahasuku vamutambakanyine ngwavo: ‘Ove Yesu, tukafwe!’ Mumakumbi aze, vaka-mbumba kavavetavishile kwiza kwakamwihi navatu vaze kavapwile namusongo kanako. Ngocho, Yesu avalwezele vayenga kutembele, mwomwo Jishimbi jaYehova jahanjikile nge mukiko vatelelele kulinga vatu vaze vapwile namusongo kana hanyima yakuvoka. Omu vapwilenga nakuya kutembele, vakasumukile vanayoyo lyehi. Kahomu  muka-mbumba umwe hali vaze 10 atachikijile ngwenyi vanamuku lyehi, hahaze vene akindulukile kuli Yesu nakumusakwilila, oku anakwalisa Kalunga. Hali vaze malunga 10, lunga umwe kaha ikiye akindulukile nakusakwilila Yesu.

Kufumaho, kwapwile nawa pwevo umwe uze avijile hamyaka 12, apwile nakutonda mutu wakumuka. Ou pwevo ahichile mukachi kavatu vavavulu nakukakwata kuuvwalo waYesu wahelu. Hahaze vene, ayoyele kumusongo wenyi. Kufumaho, Yesu ahulishile ngwenyi: “Iya nangukwate?” Numba tuhu uze pwevo evwile woma, oloze ejile nakumulweza muchano. Yesu avendejekele uze pwevo nakumulweza ngwenyi: ‘Ove mwanami yakonga mukuunda.’

Lunga umwe walijina lyaYailu alembelele Yesu ngwenyi: ‘Tuyenga kuzuvo yami! Mwanami wapwevo naviji chikuma.’ Shimbu kanda Yesu ahete kuzuvo yaYailu, uze mwanenyi afwile. Omu ahetele Yesu kuze kuzuvo, awanyine vatu vavavulu vaneza nakulishonena hamwe natanga yaYailu. Yesu avalwezele ngwenyi: ‘Kanda kulilako, ou mwana nasavala kaha tulo.’ Kufumaho akwachile kulivoko lyauze kanyike wapwevo nakwamba ngwenyi: “Ove kanyike, katuka!” Hahaze vene ahindukile nakutwama, kaha Yesu ambile kuli visemi jenyi ngwenyi muhanenuko vyakulya. Achishinganyeke omu vevwile visemi jayou mwana!