CHILONGESA 83
Yesu Mwalisa Vatu Makombakaji
Shimbu kanda likumbi lyaPaseka lihete mumwaka wa 32 C.E., omu vaposetolo vakindulukile kufuma mumulimo wavo wakwambulula, vazeyele chikuma kaha Yesu ayile navo kuMbetesayita nawato mangana vakanoke. Oloze omu wato wahetele kungenge yaKalungalwiji, Yesu amwene vatu vavavulu chikuma vanavakavangiza. Numba tuhu Yesu asakile kupwa natumbaji twenyi kaha, oloze kahangile vatu vaze vavakavangijileko. Okile vaveji, nakuputuka kuvanangula. Yesu avanangwile vyaWangana waKalunga likumbi lyamuundu. Omu kwatokele, vaposetolo jenyi vamulwezele ngwavo: ‘Vatu vanevu zala. Vasuule vayenga nakulilanjila vyakulya.’
Yesu ambile kuli vakiko ngwenyi: ‘Kavatela kuyako, oloze vahanenu vyakulya.’ Jino vaposetolo vambile kuli ikiye ngwavo: ‘Unakusaka etu tuyenga nakuvalanjila jimbolo tahi?’ Kaha kaposetolo Fwilipu ambile kuli ikiye ngwenyi: ‘Numba nge twapwanga najimbongo jajivulu, katweshi kuhasa kulanda jimbolo jakulisa vatu vavavulu nganako.’
Yesu ambile ngwenyi: ‘Uno kuliko vyakulya vimwe tahi?’ Oloze Andelei ambile kuli ikiye ngwenyi: ‘Tuli kaha najimbolo jitanu, natuvaishi tuvali. Vyakulya kana vinakehe chikuma.’ Kaha Yesu ambile ngwenyi: ‘Ngunehelenu ojo jimbolo natuvaishi.’ Kufumaho alwezele vatu vatwame hamwila mumazavu avatu 50 na 100. Jino Yesu ambachile jize jimbolo natuvaishi, nakutala mwilu, nakulomba. Kaha ahanyine vaposetolo jenyi vyakulya mangana vapangile vatu. Ngocho malunga 5,000, kuhakilako namapwevo navana valile nakwikuta. Kufumaho, vaposetolo vakungulwile vyakulya vyosena vize vyasalileho, mangana vihone kulyenyeka. Ngocho, vazalishile mitonga 12. Echi chapwile chakukomwesa chachinene! Nyi mweka?
Vatu valikomokelele chikuma, ngocho vasakile kulingisa Yesu kupwa mwangana. Oloze Yesu atachikijile ngwenyi, elu kalwapwile lwola lwakumutongola kupwa mwangana kuli Yehovako. Ngocho, asuwile vatu vayenga, nakulweza nawa vaposetolo jenyi vayenga musali yaKalungalwiji waNgalileya. Vaposetolo jenyi vengilile muwato wavo, oloze Yesu ayile kupili kwaukawenyi. Mwomwo ika? Mwomwo asakile kulomba kuli Ise. Numba tuhu apwilenga namilimo yayivulu, oloze Yesu awanyinengako lwola lwakulomba.
“Zachilenu kulya chize cheji kwililanga nakutwala kukuyoya chahaya myaka yosena chize mwamihana Mwanamutu.”—Yowano 6:27
Pamo Nauzanga Nawa
YESU—IKIYE JILA, IKIYE MUCHANO, IKIYE KUYOYA
Kulisa Makombakaji aVatu naJimbolo Jajindende NatuVaishi
Chuma chakukomwesa alingile Yesu chapwa chachilemu mwomwo vachisoneka muMikanda yosena yiwana yaMujimbu Wamwaza.
