Yowano ambulwilenga ngwenyi: ‘Kuli nakwiza mutu wamulemu uze nanguhambakana.’ Omu Yesu apwile namyaka yakusemuka kafwe 30, afumine kuNgalileya nakuya kuKalwiji Yotau, kuze Yowano apwile nakumbapachishila vatu. Omu Yesu ayile kuli Yowano mangana amumbapachise, Yowano amulwezele ngwenyi: ‘Ami kangwatelemo kukumbapachisa oveko. Mwomwo yove watela kumbapachisa ami.’ Kaha Yesu alwezele Yowano ngwenyi: ‘Yehova ali nakusaka ungumbapachise.’ Ngocho, Yowano ambapachishile Yesu hakumujimika muKalwiji Yotau.

Kahomu Yesu afumine mumeya, alombele. Halwola vene luze, mwilu mwasokolokele kaha shipilitu yaKalunga yafumine mwilu nge liyembe nakuwila hali Yesu. Kaha Yehova ahanjikile kufuma mwilu ngwenyi: “Ou ikiye Mwanami, ou ngwazanga, ou ngwevwila kuwaha.”

Yesu ejile nakupwa jino Meshiya chipwe ngwetu Kulishitu, omu shipilitu yaYehova yejile hali ikiye. Ngocho, aputukile jino kuzata mulimo vamutumine kuli Yehova hano hamavu.

Omu valingile Yesu hivanamumbapachisa lyehi, ayile mupambo muze akatwamine makumbi 40. Omu akindulukile, ayile kuli Yowano. Kahomu Yesu apandamine kuli Yowano, ikiye ambile ngwenyi: ‘Ou ikiye Mwanamukoko waKalunga uze mwakafumisa shili yamukaye.’ Omu Yowano ahanjikile mazu kana, chalingishile vatu vatachikize jino ngwavo Yesu ikiye Meshiya. Uno unatachikiza vyuma vyasolokele kuli Yesu omu apwile mupambo tahi? Mana tutale.