Yesu apwile namasepa jenyi vatatu vaze vatwaminenga muMbetane. Masepa kana vapwile Lazalu navandumbwenyi vamapwevo vavali vaMaliya naMalita. Likumbi limwe, omu Yesu apwile nakuya musali yaYotau, Maliya naMalita vatumine mujimbu kuli Yesu ngwavo: ‘Lazalu naviji chikuma. Tunakulembelela wizenga washi!’ Oloze Yesu kayile washiko. Mwahichile makumbi avali kufuma haze vamulwezele vyakuviza chaLazalu, kaha alwezele tumbaji twenyi ngwenyi: ‘Tuyenu kuMbetane. Lazalu nasavala tulo, ngocho nguli nakuya nakumuhindula.’ Vaposetolo vambile kuli ikiye ngwavo: ‘Kachi nge Lazalu nasavala tulo, kaha mwahinduka.’ Jino Yesu avalumbunwinyine hatoma ngwenyi: ‘Lazalu nafu.’

Omu Yesu ahetele kuMbetane, awanyine Lazalu vanamufundu lyehi, munahichi namakumbi awana. Vatu vavavulu vayile nakuvendejeka Malita naMaliya. Omu Malita evwile ngwavo Yesu neza, alahile nakumusesa. Kaha ambile ngwenyi: “Ove Mwata, kachi wapwanga kuno kachi ndumbwami kafwileko.” Ngocho Yesu amulwezele ngwenyi: ‘Ndumbwove mwayoya cheka. Uno unafwelela mazu kana tahi?’ Kaha Malita ambile ngwenyi: ‘Ngunafwelela chikupu ngwami mwakasanguka omu nakukapwa kusanguka.’ Jino Yesu ambile kuli ikiye ngwenyi: “Ami yami kusanguka, yami kuyoya.”

Kufumaho Malita ayile kuli Maliya nakumulweza ngwenyi: ‘Yesu neza.’ Ngocho Maliya alahile nakuya kuli Yesu, kaha vatu vavavulu vamukavangijile. Omu ahetele, alimbilile hamavu kumahinji aYesu oku ali nakulila chikuma, kaha ambile kuli ikiye ngwenyi: ‘Ove Mwata, kachi nge wapwanga kuno kachi ndumbwetu wamutonyi!’ Yesu atachikijile chinyengo evwile Maliya, ngocho naikiye aputukile kulila. Omu vatu vamwene Yesu ali nakulila vambile ngwavo: ‘Yesu azangile chikuma Lazalu.’ Oloze vamwe vahulishile ngwavo: ‘Kaha mwomwo ika ahonenanga kuka sepa lyenyi?’ Uno Yesu alingile ngachilihi?

Yesu ayile kuchimbumbe, kaha awanyine vanahakeko lilolwa lyalinene. Ngocho alwezele vatu ngwenyi: ‘Fumisenuko lilolwa.’ Oloze Malita ambile ngwenyi: ‘Mujimba wenyi naunuka, mwomwo munahichi lyehi makumbi awana.’ Chipwe ngocho, vatu vafumishileko lize lilolwa, kaha Yesu alombele ngwenyi: ‘Ove Tata, ngunakusakwilila hakungwivwa.’ Ngunatachikiza ngwami weji kungwivwanga shimbu yosena. Oloze ngunambe ngocho  mwomwo yavatu vavavulu ava, mangana vetavile ngwavo yove wangutumine.’ Kufumaho, ahanjikile nalizu lyakukanguka ngwenyi: “Ove Lazalu, lovokamo!” Ngocho, vatu valikomokelele chikuma hakumona Lazalu ali nakulovoka muchimbumbe oku hanga achili namahina vamujingile. Jino Yesu ambile ngwenyi: “Mukasununenu nakumwecha ayenga.”

Vatu vavavulu vaze vamwene omu vasangwile Lazalu, vafwelelele jino Yesu. Oloze vamwe vayile nakulweza vaFwaliseu. Kufuma vene haze, vaFwaliseu vasakile kujiha Lazalu naYesu. Ngocho Yuta Isakalyote uze apwile kaposetolo kenyi, ayile kuli vaFwaliseu nakuvahulisa ngwenyi: ‘Namunguhana jimbongo jingahi kachi nge nangumisolwela Yesu?’ Valivwasanyine kumufweta jimbongo jachichele japalata 30, ngocho Yuta aputukile kutondatonda jijila jakusolwelamo Yesu kuli vaFwaliseu.