VaFwaliseu vajinjile chikuma Yesu, ngocho vasakile kumuwanyina mulonga mangana vamukwate. Vambilenga ngwavo katela kuka vaveji haSambatako. Jino likumbi limwe lyaSambata, Yesu awanyine lunga umwe wakapuputa ali nakulombalomba mujila. Ngocho, alwezele tumbaji twenyi ngwenyi: ‘Talenu omu ngolo jaKalunga najikafwa ou lunga.’ Kaha Yesu afwijile maleji nakuwafutula namavu nakuwashila mumeso ayauze lunga wakapuputa. Kufumaho Yesu amulwezele ngwenyi: ‘Yako kuChijiva chaShilowame ukasane kumeso.’ Uze lunga alingile kweseka namuze vamulwezele, ngocho meso enyi atonene, kaha aputukile kumona.

Vatu valikomokelele chikuma, ngocho vambile ngwavo: ‘Uno ou keshi ikiye uze atwaminenga nakulombalombako nyi pamo nalifwane kaha nenyi tahi?’ Kaha uze lunga ambile ngwenyi: ‘Yami vene, ngwasemukile kapuputa.’ Jino vatu vamuhulishile ngwavo: ‘Uno unatono ngachilihi?’ Omu avalwezele vyuma vyasolokele, vatu vamutwalile kuli vaFwaliseu.

Uze lunga alwezele vaFwaliseu ngwenyi: ‘Yesu angushilanga mavu akufwijila maleji enyi mumeso ami, kaha angulwezanga nguyenga nakusana kumeso, kaha ngwalinganga vyuma angulwezanga, ngocho ngunaputuka jino kumona.’ Kaha vaFwaliseu vambile ngwavo: ‘Kachi nge Yesu mwoka mutu haSambata, kaha ngolo jenyi kajafuma kuli Kalungako.’ Oloze vamwe vambile ngwavo: ‘Nge ngolo jenyi kajafuma kuli Kalungako, kaha keshi kuhasa kuka misongoko.’

Kutwala muze, vaFwaliseu vasanyikile visemi jauze lunga  nakuvahulisa ngwavo: ‘Uno ou mwanenu naputuka kumona ngachilihi?’ Visemi jenyi vevwile woma, mwomwo vaFwaliseu vambile ngwavo weshowo mwafwelela Yesu, navakamufumisa musunangonga. Shikaho, vambile ngwavo: ‘Katwatachikijileko, muhulisenu enu vavene.’ Ngocho, vaFwaliseu vahulishile uze lunga vihula vyavivulu, kaha avakumbulwile ngwenyi: ‘Ngunamilweze vyuma vyosena ngwatachikiza. Mwomwo ika muli nakunguhulishila lika vihula?’ Echi chalingishile vaFwaliseu vapihilile nakumuhanga.

Yesu awanyine uze lunga, kaha amuhulishile ngwenyi: ‘Kutala wafwelela Meshiya tahi?’ Jino uze lunga amukumbulwile ngwenyi: ‘Ngunahase kumufwelela kachi nge nangumutachikiza.’ Kaha Yesu amukumbulwile ngwenyi: ‘Ami yami Meshiya.’ Uno unamono omu Yesu asolwele likoji tahi? Yesu okile ou lunga nakumukafwa nawa apwenga nalufwelelo.