Omu Yesu alingile hanazate mulimo wakwambulula kafwe hamwaka umwe nachimbwa, apwile jino nakusaka kulinga chuma chachilemu chikuma. Uno veya mwasakula vapwenga vaposetolo jenyi? Uno veya mwanangula vatwaminyinenga chikungulwilo chavaka-Kulishitu? Hakusaka kulinga chuma kana, Yesu asakile Yehova amutwaminyine. Ngocho, ayile kupili kwaukawenyi nakulomba ufuku wosena. Lichako nachimene, Yesu asanyikile tumbaji twenyi vosena nakusakulaho vaposetolo 12. Uno unakwanuka majina avo tahi? Majina avo shina Petulu, naAndelei, naYakova, naYowano, naFwilipu, naMbalaTolomeu, naTomase, naMateu, naYakova mwanaAlefweu, naTateu, naShimona naYuta Isakalyote.

Asakwile ava vaposetolo 12 mangana atambukenga navo. Omu akumishile kuvanangula, avatumine vayenga nakwambulula chakuzeneka ikiye. Yehova avahanyine ngolo jakufumisa vandemone nakuka vaveji.

Yesu avulukilenga vaze vaposetolo ngwenyi masepa jenyi, kaha avafwelelele chikuma. Oloze vaFwaliseu vashinganyekele ngwavo ava vaposetolo vapwile vatu vamokomoko, vakuhona kutanga. Oloze Yesu avanangwile mwakuzachila mulimo kana. Kaha Yesu apwilenga navo  shimbu kanda afwenga nahanyima yakusanguka chenyi, mwomwo elu lwapwile lwola lwalulemu chikuma mukuyoya chenyi. Ngana mwaYesu, navaposetolo jenyi vamwe vafumine kuNgalileya. Vaposetolo vamwe vapwile namapwevo javo.

Vaposetolo kavapwile vakukupukako, ngocho shimbu jimwe valimbenjelenga. Lwola lumwe vahanjikilenga chakuhona kushinganyeka nakulimbenja hakusakula vyakulinga. Shimbu jimwe nawa, kavapwilenga namuchima wakutalilila chikokiko. Kaha valipulilenga najipami hakufwila kutachikiza iya apwile wamulemu hakachi kavo. Chipwe ngocho, vapwile vatu vavilinga vyamwaza vaze vazangilenga Yehova. Shikaho, omu Yesu akindulukile mwilu, ava vaposetolo vakiko vapwile vatu vatete kuzata milimo yayilemu muchikungulwilo chavaka-Kulishitu.