VaYuleya valingilenga chilika chaPaseka mwaka himwaka mukakweji waNyisane 14. Chilika kana chavanukishilenga omu Yehova avayowele muundungo muEjipitu nakuvatwala muLifuchi lyaLushiko. Kaha mumwaka wa 33 C.E., Yesu navaposetolo jenyi navakiko valingile echi chilika chaPaseka mukapete kahelu muYelusalema. Omu vakumishile kulya, Yesu ambile ngwenyi: ‘Umwe hali enu mwangusolola kuli vaka-kole.’ Vaposetolo valikomokelele hamazu kana, ngocho vamuhulishile ngwavo: ‘Iya mwakusolola?’ Kaha Yesu ambile ngwenyi: ‘Mutu kana shina ou nanguhana eyi mbolo.’ Ngocho ahanyine Yuta Isakalyote mbolo. Hahaze vene, Yuta akatukile nakuvaseza, nakulovoka mukapete.

Kufumaho, Yesu alombele kaha apuzwile mbolo nakuyihana vaposetolo vaze vasalile nenyi. Ambile ngwenyi: ‘Lyenu eyi mbolo, mwomwo yinemanyinako mujimba wami.’ Alombele cheka kaha ahanyine vaposetolo jenyi vinyo nakwamba ngwenyi: ‘Nwenu evi vinyo, mwomwo vinemanyinako manyinga ami aze nanguhana mangana vamikonekele jishili jenu. Ngunamifwelelesa ngwami, namukapwanga vamyangana hamwe nayami mwilu. Lingenunga lika ngocho mwaka himwaka mangana mungwanukilengaho.’ Shikaho, navaka-kukavangiza Yesu makumbi ano veji kulinganga chilika kanechi mwaka himwaka nachingoloshi. Chilika kana veji kuchivulukanga ngwavo, Kulya chaMwata chaChingoloshi.

 Omu vakumishile kulya, vaposetolo vaputukile kulipula jipami mangana vatachikize ou apwile wamulemu hakachi kavo. Oloze Yesu avalwezele ngwenyi: ‘Mutu wamulemu hakachi kenu apwenga nge kanyike wamundende, nakulimona kupwa wamokomoko hali vakwavo.

‘Enu mwapwa mumasepa jami, kaha ngweji kumilwezanga vyuma vyosena vize Tata asaka ngumilweze. Kalinwomu nguyenga kuli Tata mwilu. Nangumiseza, kaha vatu vosena navakatachikiza ngwavo mwapwa mutumbaji twami, kachi nge namulizanganga mwenumwenu. Mwatela kulizanga navakwenu ngana muze ngwamizanga ami.’

Kufumaho, Yesu alombele kuli Yehova mangana akinge tumbaji vosena. Alombele Yehova mangana avakafwe vazachile hamwe mukuunda. Kaha alombele nawa ngwenyi, lijina lyaYehova valijilike. Ngocho, Yesu navaposetolo jenyi vembile myaso yakwalisa Yehova, kaha valovokele haweluka. Lwola jino lwahetele lwakukwata Yesu.