Omu Yesu apwile navaposetolo jenyi mukapete kahelu, avalwezele ngwenyi: ‘Enu muvosena namungukana.’ Oloze Petulu ambile ngwenyi: ‘Nduma! Numba nge vakwetu vosena navakuseza, oloze ami kangweshi kukusezako.’ Ngocho Yesu alwezele Petulu ngwenyi: ‘Shimbu kanda ndemba atambike, naukahanjika mapapa katatu ngwove kawangutachikizako.’

Omu maswalale vatwalile Yesu kuzuvo yaKayafwase, vaposetolo vavavulu vachinyine. Oloze vavali vamukavangijile halizavu lyavatu vavavulu. Hali ava vavali umwe apwile Petulu. Kaha engilile kuchipango chazuvo yaKayafwase nakuputuka kwota kakahya. Omu ngamba wapwevo wakanyike amwene Petulu, ambile kuli ikiye ngwenyi: ‘Ngunakutachikiza! Nayove wapwanga naYesu!’

Petulu akanyine nakwamba ngwenyi: ‘Nduma, kangwapwanga nenyiko! Kangwatachikijile vyuma uli nakuhanjikako!’ Ngocho akatukile nakuya kuwingililo wachipango. Kutwala muze, ngamba wapwevo mukwavo ejile nakwamba ngwenyi: ‘Nayou lunga apwanga naYesu!’ Jino Petulu ambile ngwenyi: ‘Ami naYesu vene, kangwamutachikizako!’ Kaha lunga umwe ambile ngwenyi: ‘Nayove unapunga hamwe navakiko! Nahanjikiso yove yinakusolola nge wafuma kuNgalileya ngana mwaYesu.’ Oloze Petulu alishingile ngwenyi: ‘Ami ngwami kangwamutachikizako!’

Hahaze vene, ndemba atambikile. Petulu amwene Yesu mwalumuka nakumutala. Kaha anukile mazu amulwezele Yesu, ngocho alovokele haweluka nakuputuka kulila.

Halwola kana, vaka-zango yaSunendeline vatwalile chihande chaYesu kuzuvo yaKayafwase mangana vakamusopese. Vatu kana valikashile lyehi kujiha Yesu, oloze vatondelenga kaha kengililo kakumujihilaho. Oloze kavakawanyineko mwomwo kapwile namulongako. Kutwala muze, Kayafwase ahulishile Yesu ngwenyi: ‘Ove yove MwanaKalunga tahi?’ Yesu amukumbulwile ngwenyi: ‘Yami vene.’ Ngocho Kayafwase ambile ngwenyi: ‘Katweshi nakutonda unjiho  wekako. Aka hikasautu!’ Vatu vosena vapwile muzango vambile ngwavo: ‘Ou mutu atela kufwa.’ Ngocho vamuvetele jimbanda, nakumufwijila maleji, nakumufwika hameso, nakumuveta nakwamba ngwavo: ‘Nge ukapolofweto tulweze mutu nakuvete!’

Lichako, vatwalile Yesu kuSunendeline nakumuhulisa cheka ngwavo: ‘Ove yove MwanaKalunga tahi?’ Yesu avakumbulwile ngwenyi: ‘Yenu munambemo, yami vene.’ Ngocho vamuvangijikilile hakwamba ngwavo ali nakasautu, kaha vamutwalile kuli Pondeu Pilatu uze apwile nguvulu wavaLoma. Vyuma muka vyakavangijileho? Mana tutale.