CHILONGESA 93
Yesu Mwakinduluka Mwilu
Omu Yesu ayile kuNgalileya, aliwanyine navaka-kumukavangiza. Avahanyine mulimo waulemu chikuma. Ambile ngwenyi: ‘Yenunga mukanangule vatu vakumafuchi osena vakapwe tumbaji, mukavanangule vyuma vyosena vize ngunamilweze, nakuvambapachisa.’ Kufumaho avashikile ngwenyi: ‘Nangupwanga lika nayenu.’
Hamakumbi 40 aze ayoyele kufuma hakusanguka chenyi, Yesu asolokele kuli tumbaji twenyi vavavulu muNgalileya namuYelusalema. Avanangwile vyuma vyavilemu chikuma nakulinga vyuma vyakukomwesa vyavivulu. Kufumaho, Yesu aliwanyine navaposetolo jenyi kamakumishilo kuPili yaMilive. Kaha avalwezele ngwenyi: ‘Kanda namufuma muYelusalemako, oloze twalenuho lika kuvandamina vyuma namishiki Tata.’
Vaposetolo jenyi kavevwishishile vyuma apwile nakulumbununako. Ngocho vamuhulishile ngwavo: ‘Uno mupwa jino uMwangana waIsalele tahi?’ Jino Yesu avakumbulwile ngwenyi: ‘Luno keshi lwola lwaYehova lwakungutongola kupwa Mwanganako. Oloze kalinwomu mutambule ngolo kufuma kushipilitu yajila, kaha namukapwa muvinjiho jami. Yenunga nakwambulula kuYelusalema, nakuYuleya, nakuSamaliya nakuvihela vyeka vyakwakusuku vyahamavu.’
Kufumaho, Yesu vamuzezwile mwilu kaha livwi lyamufwikile. Tumbaji twenyi vatalile lika mwilu oloze kavamumwene chekako.
Kutwala muze, tumbaji twenyi vafumine kuPili yaMilive nakuya kuYelusalema. Ngocho, valikungulwilenga mapapa kakavulu mukapete kahelu nakulomba. Vapwile nakuvandamina kuvahana jindongi jikwavo kuli Yesu.
“Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—Mateu 24:14
Pamo Nauzanga Nawa
YESU—IKIYE JILA, IKIYE MUCHANO, IKIYE KUYOYA
Vatu Vavavulu Vamwene Yesu Shimbu Kanda Pendekoseta
Kufuma halwola vamusangwile nakuheta halwola ayile mwilu, Yesu ahanjikilenga kuli tumbaji twenyi mapapa kakavulu vyuma navakatambula namujila navakavizachishilamo.
