Vapilishitu vavakulwane vatwalile Yesu kuli nguvulu. Kaha Pilatu avahulishile ngwenyi: ‘Uno ou lunga munamuwane namulonga muka?’ Vakiko vamukumbulwile ngwavo: ‘Anakulivuluka ivene ngwenyi apwa mwangana!’ Jino Pilatu ahulishile Yesu ngwenyi: “Ove yove Mwangana wavaYuleya tahi?” Kaha Yesu amukumbulwile ngwenyi: “Wangana wami kaweshi wamukaye kanoko.”

Kutwala muze, Pilatu avalwezele vatwale Yesu kuli Helote uze apwile nakuyula Ngalileya amone numba nge mwamuwanyina mulonga. Helote naikiye kawanyine Yesu namulongako, ngocho amukindulwishile cheka kuli Pilatu. Jino Pilatu alwezele vatu ngwenyi: ‘Ami naHelote katwawanyine ou lunga namulongako. Ngocho nangumusuula.’ Oloze vatu vambile ngwavo: ‘Mujihe! Mujihe!’ Ngocho maswalale vavetele Yesu vikote, nakumufwijila maleji. Kufumaho, vamuvwikile muchama wamingonga kumutwe nakwamba ngwavo: ‘Mwoyo wove, ove Mwangana wavaYuleya.’ Kaha Pilatu alwezele cheka vatu ngwenyi: ‘Ami kangwawanyine ou lunga namulongako.’ Oloze vatu vatambakanyine ngwavo: “Vamupapalile hachitondo!” Ngocho, Pilatu avahanyineyo mangana vamupapalile.

Kufumaho, vamutwalile kuchihela kuze vavulukilenga ngwavo Ngolongota, kaha vamupapalilile hachitondo, nakuchimika. Jino Yesu alombele ngwenyi: ‘Tata, vakonekele, mwomwo kavatachikijile chuma vali nakulingako.’ Ngocho, vatu vaputukile kusaula Yesu nakwamba ngwavo: ‘Kachi nge uMwanaKalunga, fuma hachitondo mangana ulilwile ove ivene.’

Chihwanga umwe uze vapapalilile hamwe naYesu ambile kuli ikiye ngwenyi: “Kangwanukeko omu naukengila muWangana wove.” Kaha Yesu amushikile ngwenyi: “Naukapwa nayami muPalachise.” Halikumbi vene lize namusana, kwasolokele milima mulifuchi lyosena yize yambachile jiola jitatu. Tumbaji vamwe vemanyine kwakamwihi nachize chitondo chakuyanjishila, hali ava tumbaji hapwile naMaliya naye yaYesu. Ngocho, Yesu alwezele Yowano azakamenga Maliya ngana mwanaye wakumusema.

Kutwala muze, Yesu ambile ngwenyi: “Vyuma vyosena vinatesamo jino.” Kufumaho azewile mutwe, nakutulisa mwono wenyi. Halwola kana, kwasolokele mundenda waunene. Kaha nawa, lihina lyamutembele lize lyahandunwine muchihela muze Mwajila naMuze  Mwajila Chikuma lyapulikile hakachi. Ngocho liswalale umwe ambile ngwenyi: ‘Chikupu vene, ou apwanga MwanaKalunga.’