Omu Yesu afwile, lunga umwe waluheto walijina lyaYosefwe ayile kuli Pilatu nakumulomba amwitavise akafumise mujimba waYesu hachitondo. Yosefwe ambachile uze mujimba, nakuuvungila halihina lyamwaza litoma, nakuukwita vitumbo, nakuufunda muchimbumbe chachihya. Kufumaho, ashindumwinyine lilolwa lyalinene kuchikolo chachimbumbe. Ngocho, vapilishitu vavakulwane vayile kuli Pilatu nakwamba ngwavo: ‘Tunalizakamina ngwetu tumbaji twaYesu vamwe naveza nakumbata mujimba wenyi nakulweza vatu ngwavo, vanamusangula lyehi kuvafu.’ Ngocho, Pilatu avalwezele ngwenyi: ‘Kalamikenuko katachikijilo kuchimbumbe nakuchilama.’

Kahomu mwahichile makumbi atatu, mapwevo vamwe vayile kuchimbumbe nachimene, oloze vawanyine lize lilolwa lyapwile kuchimbumbe vanalifumisako. Kaha mukachi kachimbumbe mwapwile kangelo uze alwezele vaze mapwevo ngwenyi: ‘Kanda kwivwa womako, mwomwo Yesu vanamusangula lyehi. Shikaho, Yenu mukalweze tumbaji twenyi mangana vayenga nakumuwana kuNgalileya.’

Jino Maliya wakuMangatala alahile nakuya kuli Petulu naYowano, kaha ambile kuli vakiko ngwenyi: ‘Kuli umwe nambate mujimba waYesu!’ Ngocho Petulu naYowano, vayile jimbushi kuchimbumbe. Omu vamwene ngwavo muchimbumbe mwapwile mwamupolongwa, vakindulukile kumembo avo.

Omu Maliya akindulukile kuchimbumbe, awanyine vangelo vavali vali mukachi kaha avalwezele ngwenyi: ‘Kangwejivile okwo vanatwale Mwatako.’ Kufumaho, amwene lunga umwe, ngocho ashinganyekele ngwenyi pamo apwile muka-kuzata mumilemba, kaha amuhulishile ngwenyi: ‘Ove mwata, ngulweze okwo unamutwale.’ Oloze omu uze lunga amusanyikile halijina ngwenyi, “Maliya!” Kaha atachikijile jino ngwenyi uze lunga apwile Yesu. Ngocho atambakanyine ngwenyi: “Ove Muka-kunangula!” Nakumupakata mukasamba. Ngocho Yesu amulwezele ngwenyi: ‘Yako kuli vandumbwami, ukavalweze ngwove, unangumono.’ Hahaze vene, Maliya alahile nakuya kuli vaposetolo nakuvalweza ngwenyi, ngunamono Yesu.

Halikumbi vene lize, tumbaji twenyi vavali vapwile nakufuma kuYelusalema nakuya kuEmau. Kaha vawanyine lunga umwe uze aputukile kutambuka navo hamwe, ngocho avahulishile vyuma vapwile nakuhanjika. Vamuhulishile ngwavo: ‘Uno ove kawatachikijile vyuma vinasolokako tahi? Munahichi jino makumbi atatu kufuma haze vapilishitu vavakulwane vajihanga Yesu. Oloze  mapwevo vamwe vanakwamba ngwavo, wamutonyi.’ Kaha uze lunga avahulishile ngwenyi: ‘Uno kamwafwelela vapolofwetoko tahi? Vapolofweto vambile ngwavo Kulishitu mwakafwa, kaha navakamusangula.’ Ngocho, uze lunga atwalileho lika kuvalumbunwina Visoneka. Kahomu vahetele kuEmau, vaze tumbaji valwezele uze lunga mangana vayenga nenyi hamwe. Shimbu kanda vaputuke kulya nachingoloshi, uze lunga alombele, kaha halwola kana hakiko jino vatachikijile ngwavo kumana apwile Yesu. Kufumaho alelanganyine.

Vaze tumbaji vavali valahile nakuya kuzuvo yamuYelusalema kuze vaposetolo valikungulwilile nakuvalweza vyuma vyasolokele. Kahomu vapwile muze muzuvo, Yesu asolokele kuli vosena. Hakavanga, vaposetolo kavafwelelele ngwavo apwile Yesuko. Kaha ambile ngwenyi: ‘Talenu mumavoko ami, ngukwatenu. Mwomwo vasoneka ngwavo Kulishitu navakamusangula kuvafu.’