Lunga umwe wachitonji atwaminenga kuchikolo chakutembele nakulombalomba hakumbi hakumbi. Likumbi limwe nachingoloshi, amwene Petulu naYowano vali nakwingila mutembele. Ngocho, ambile kuli vakiko ngwenyi: ‘Nguhanenuko wana.’ Petulu amukumbulwile ngwenyi: ‘Nangukuhana chuma chachilemu kuhambakana jimbongo. Mulijina lyaYesu, tambuka!’ Kufumaho, Petulu amukatwile, kaha aputukile kutambuka. Vatu valikomokelele hakumona echi chakukomwesa, kaha chalingishile vatu vavavulu vapwenga vaka-kwitava.

Chipwe ngocho, vapilishitu navaSatuse vapihililile chikuma. Ngocho, vakwachile vaposetolo nakuvatwala kuzango nakuvahulisa ngwavo: ‘Iya namihane ngolo jakuka ou lunga?’ Petulu avakumbulwile ngwenyi: ‘Twatambwile ngolo kufuma kuli Yesu Kulishitu uze mwajihile.’ Jino vatwamina vamukwitava vahanjikile nalizu lyakukanguka ngwavo: ‘Litwaminenu kuhanjika hali Yesu!’ Oloze vaposetolo vavakumbulwile hatoma ngwavo: ‘Twatela kuhanjika hali ikiye, katwatela kulitwaminako.’

Omu Petulu naYowano vavasuwile, vayile kuli tumbaji vakwavo nakuvalweza vyuma vyavasolokelele. Ngocho, valombelele hamwe kuli Yehova ngwavo: ‘Tunakukulomba utukafwe tupwenga vakumika mangana tutwaleho kuzata mulimo wove.’ Yehova avahanyine shipilitu yenyi yajila, kaha vatwalileho lika kwambulula nakuka misongo. Echi chalingishile vatu vavavulu vapwenga vaka-kwitava. VaSatuse vevwile lwiso, ngocho vakwachile vaposetolo nakuvakasa mukamenga. Oloze, Yehova atumine kangelo naufuku mangana asokolole kuchikolo chakukamenga nakuvalweza ngwenyi: ‘Kindulukenu kutembele mangana mukanangule.’

Lichako nachimene, vakulwane vamukwitava vamuzango yaSunendeline vavalwezele ngwavo: ‘Tunawane kukamenga kwakusoka, oloze vaze malunga mwakasanga vauchimo! Vanayi kutembele nakunangula vatu!’ Vaposetolo vavakashile cheka nakuvatwala kuzango yaSunendeline. Ngocho, kapilishitu wakulitulaho avalwezele ngwenyi:  ‘Twamikanyisanga kuhanjika vyaYesu!’ Oloze Petulu avakumbulwile ngwenyi: “Twatela kwononoka Kalunga hakupwa ikiye muka-kuyula, kuhambakana vatu.”

Vaka-kunangula vamukwitava vapihililile chikuma, ngocho vasakile kujiha vaposetolo. Oloze kaFwaliseu umwe walijina lyaNgamalyele akatukile nakwamba ngwenyi: ‘Zangamenu! Pamo Kalunga ali navava malunga. Uno muli nakusaka kuzunga naKalunga tahi?’ Vakavangijile mazu avalwezele. Omu vakumishile kuveta vaposetolo najimbwechi, vavakanyishile cheka kwambulula, nakuvasuula vayenga. Oloze vaposetolo kavalitwaminyinyineko. Vatwalileho lika kwambulula mujimbu wamwaza nakumika kuzuvo hizuvo nakutembele.