Paulu ayile ungeji wenyi wakwambulula wamuchitatu, uze wakuminyinyine muYelusalema. Kwakuze vene vamukwachile nakumuhaka mukamenga. Likumbi limwe naufuku, Yesu amulwezele muchakumwenesa ngwenyi: ‘Muya kuLoma nakwambulwilako.’ Paulu vamufumishile muYelusalema nakumutwala kuKesaliya kuze vamukashile mukamenga hamyaka yivali. Omu vapwile nakumusopesa kuli Nguvulu Fwesetu, Paulu ambile ngwenyi: ‘Echenu chihande chami vakachivatule kuli Kesale muLoma.’ Ngocho Fwesetu ambile kuli ikiye ngwenyi: “Unalombo lyehi chihande chove vakachisope kuli Kesale, ngocho nauya vene kuli Kesale.” Jino Paulu vamuhakile muwato uze wapwile nakuya kuLoma, kaha vandumbwenyi vavali vaLuka naAlishitaku vayile nenyi hamwe.

Hakuwana nge hakalungalwiji hahuhwile peho yayinene, ngocho vashimbwileho makumbi amavulu. Kaha vatu vosena vashinganyekele ngwavo pamo navafwa. Oloze Paulu ambile ngwenyi: ‘Enu malunga, kangelo angulwezanga muchilota ngwenyi: “Ove Paulu, kanda nawivwa womako. Watela kuya kuLoma, vosena vaze uli nakutambuka navo muwato navapwa vakukingiwa.” Shikaho, Umikenu! Katweshi kufwako.’

Peho yahuhwile hamakumbi 14. Kutwala muze, vaputukile jino kumona oku vapwile nakuya, kaha vamwene litungu lyaMelita. Numba tuhu wato walivetele mumavu nakupazuka, oloze vatu vosena vapwilemo vakuheta ku 276 vayovokele. Vamwe vahalile, kaha veka vakwachile kuvihanda vyawato vize vyapazukile nakufungumukila kungenge. Vatu vamuMelita vavazakamine nakuvawikila kakahya mangana votenga.

Omu mwahichile tukweji vatatu, maswalale vatwalile Paulu kuLoma kuzachisa wato weka. Hakuheta kuze, vandumbwenyi vayile nakumumona. Kahomu vamumwene vawahililile chikuma, kaha Paulu asakwililile Yehova nakupwa wakumika. Numba tuhu, Paulu apwile funge, oloze vamwitavishile kutwama muzuvo yakufwetela, oku vali nakumulama kuli liswalale. Ngocho, atwamine muLoma myaka yivali. Vatu vejilenga nakumumona, kaha avanangwilenga vyaWangana waKalunga, nakuvanangula vyaYesu. Paulu asonekelenga nawa mikanda kuvikungulwilo vyamuAja, namuYuleya. Chikupu vene, Yehova azachishile Paulu atandakanyise mujimbu wamwaza kumafuchi.