MuKesaliya mwapwilenga kapitau kamaswalale wavaLoma wamulemu walijina lyaKolonelyu. Numba tuhu kapwile kaYuleyako, oloze vaYuleya vamuhanyinenga kavumbi. Akafwilenga vatu vakuhutwa navaze vapwilenga muukalu. Kolonelyu afwelelelenga Yehova, nakulombanga kuli ikiye lwola lwosena. Likumbi limwe kangelo asolokele kuli Kolonelyu nakumulweza ngwenyi: ‘Kalunga nevu kulomba chove. Shikaho, tuma malunga vayenga kunganda yaNjopa, kuze kwatwama Petulu mangana vakamulweze ezenga kuli ove.’ Hahaze vene, Kolonelyu atumine malunga vatatu vayenga kuNjopa kafwe jikilomita 50 kuya kuSulo.

Kaha Petulu vamumwenesele chakumwenesa kuNjopa. Muchakumwenesa kana, amwene tunyama vaze vakanyishile vaYuleya kulya, kaha evwile lizu lyakumulweza alyenga tunyama kana. Oloze Petulu akanyine, nakwamba ngwenyi: ‘Kanda ngulyengangaho lyehi kanyama wamajilo mukuyoya chamiko.’ Ngocho lize lizu lyamulwezele ngwalyo: ‘Kanda uvuluka cheka ngwove ava tunyama vamajiloko. Mwomwo Kalunga navatomesa lyehi.’ Kaha vamulwezele nawa ngwavo: ‘Hachikolo chove hanemana malunga vatatu. Shikaho yako navo.’ Ngocho Petulu ayile kuze kuchikolo nakuhulisa vaze malunga vamulweze ovyo vakatukilile. Vakiko vamulwezele ngwavo: ‘Vanatutumu kuli Kolonelyu kapitau kamaswalale javaLoma, mangana tuyenga nayove hamwe kuzuvo  yenyi kuKesaliya.’ Ngocho Petulu alwezele vaze malunga vasavale kuzuvo yenyi. Likumbi lyakavangijileho, Petulu ayile navo kuKesaliya, hohamwe navandumbwenyi vakuNjopa.

Omu Kolonelyu amwene Petulu alimbilile hamavu kumahinji enyi. Oloze Petulu ambile ngwenyi: ‘Imana, nayami nawa ngumutu kaha. Kalunga ikiye nangulweze ngwizenga kuzuvo yove numba tuhu vaYuleya kavengila mujizuvo javatu vakumafuchi ekako. Shikaho, ngulweze jino vyuma unangusanyikila.’

Kolonelyu alwezele Petulu ngwenyi: ‘Makumbi awana anahichimo, ngwalombanga kuli Kalunga, kaha kangelo angulwezanga ngutume vatu vakakusake. Shikaho, tunangule mazu aYehova.’ Jino Petulu ambile ngwenyi: ‘Ngunatachikiza jino ngwami, Kalunga katala vatu kumesoko. Oloze eji kwitavilanga kala mutu mwasaka kumulemesa.’ Ngocho Petulu avanangwile vyuma vyavivulu hali Yesu. Kufumaho, shipilitu yajila yejile hali Kolonelyu navaze apwile navo hamwe, kaha vavambapachishile.