Vaposetolo vononokele Yesu hakukavangiza lushimbi lwakutandakanyisa mujimbu wamwaza hamavu hosena. Kaha mumwaka wa 47 C.E., Paulu naMbalanape vavatumine kuli vandumbwavo vamuAndeyoka kuya nakwambulwila kungalila yeka. Ava vaka-kwambulula vatwima vavali, vayile nakwambulwila kuvihela vyamuAja vyakufwana nge Ndeleve, naLusutala naIkonyume.

Paulu naMbalanape vambulililenga vatu vosena numba vapwa valuheto chipwe vakuhutwa, vanyike chipwe vakulwane. Vatu vavavulu vetavilile muchano wakuvuluka Kulishitu. Omu Paulu naMbalanape vambulilile Seleju Paulu uze apwile nguvulu waKupulusu, muka-kupanda umwe asakile kuvakanyisa. Ngocho, Paulu alwezele uze muka-kupanda ngwenyi: ‘Yehova nakuhungu.’ Hahaze vene, uze muka-kupanda apwile kapuputa. Omu nguvulu Paulu amwene vyuma vyasolokele, apwile jino muka-kwitava.

Paulu naMbalanape vambulwililenga kuvihela vyakulisezaseza vyakufwana nge kuzuvo hizuvo, nakuvisakano, namumikwakwa namujisunangonga. Omu vokile chitonji umwe muLusutala, vatu vaze vamwene echi chakukomwesa vashinganyekele ngwavo Paulu naMbalanape vapwile tulunga ngocho vasakile kuputuka kuvalemesa. Oloze Paulu naMbalanape vavakanyishile nakuvalweza ngwavo: ‘Lemesenunga Kalunga! Etu tuvatu kaha.’ Kufumaho, vaYuleya vavavulu vafumbukilile Paulu. Ngocho, vaputukile kumwasa malolwa nakumukokela kuweluka wanganda mwomwo vashinganyekele ngwavo nafu. Oloze, Paulu apwile lika wamutonyi. Hahaze vene vandumbwenyi vejile nakumumbata nakumukindulwisa cheka munganda. Kutwala muze, Paulu akindulukile cheka kuAndeyoka.

Kuheta mu 49 C.E., Paulu ayile cheka ungeji ukwavo. Omu akindulukile nakumona vandumbwenyi muAja, ayile nakwambulwila muEurope. Ngocho  ayile nakwambulwila kuAtene, nakuEfwesu, nakuFwilipi, nakuTesolonyika nakuvihela vyeka. Kaha Shilase, naLuka namukweze walunga walijina lyaChimoteu vayile hamwe naPaulu. Ngocho, vazachililile hamwe hakutunga vikungulwilo nakukolezeza vandumbwavo mangana vajikize. Paulu atwamine muKolinde mwaka umwe nachimbwa mangana akolezeze vandumbwenyi. Ambulwilenga mujimbu, nakunangula vatu, nakusonekela vikungulwilo mikanda. Azachilenga nawa mulimo wakutunga jimbalaka. Omu mwahichile lwola, Paulu akindulukile kuAndeyoka.

Kuheta mu 52 C.E., Paulu ayile ungeji wenyi wamuchitatu. Avangililile kuya muAja, kaha ayile kuFwilipi, kufumaho ayile kuKolinde. Atwamine myaka yayivulu muEfwesu, apwile nakunangula, nakuka misongo nakukafwa chikungulwilo. Paulu ahanjikilenga navihande vyalikungumbuwa kuchihela chachinene chahashikola valikungulwililenga vatu vavavulu. Ngocho, vatu vavavulu vevwililenga, kaha vasezele vilinga vyavo vyavipi. Omu akumishile kwambulula mujimbu wamwaza kumafuchi amavulu, Paulu akindulukile kuYelusalema.