Omu kaposetolo Yowano apwile mukamenga halitungu lyaPatamu, Yesu amumwenesele vyakumwenesa 16 chipwe mivwimbimbi yavyuma navikasoloka kulutwe. Vyakumwenesa kana, vyasolwele omu lijina lyaYehova navakalijilika, nomu Wangana wenyi naukeza, nomu nawa kujina chaYehova nachikatesamo hamavu ngana muze chatesamo mwilu.

Muchakumwenesa chimwe, Yowano amwene Yehova natwame halitanda lyaupahu mwilu, kaha vanamujingilika kuli vakulwane 24 vaze vavwalile mahina atoma, kaha kumitwe yavo vavwalile michama yaulu. Kaha kulitanda kana kwavesele miveso kaha kwevwakanyine mikalateta. Vaze vakulwane 24 vafukamine nakulifukula kuli Yehova nakumulemesa. Muchakumwenesa chikwavo, Yowano amwene liyongomena lyalinene lyavatu vakufuma kumafuchi osena, nakuvatu veka naveka vosena, nakumalimi osena vaze veji kwalisanga Yehova. Kaha Yesu uze apwa Mwanamukoko ali nakuvafunga nakuvatwala kumeya akuyoya. Kufumaho, muchakumwenesa chikwavo amwene Yesu ali nakuyula hamwe navaze vakulwane 24 muWangana wamwilu. Muchakumwenesa chikwavo nawa, Yowano amwene Yesu ali nakuzunga nachazangombe uze apwa Satana,  navandemone jenyi. Yesu avandandumwine mwilu nakuvambila hano hamavu.

Kutwala muze, Yowano amwene jino muvwimbimbi wamwaza waMwanamukoko navatu 144,000 vanemana haPili Zeyone. Kaha amwene kangelo ali nakutuka nakulweza vatu vahamavu ngwenyi, ivwenunga Kalunga woma, nakumutohwesa.

Muchakumwenesa chakavangijileho, amwene vali nakuzunga jita yaAlamangetone. Yesu navatu jenyi vafungulwile kano kaye kaSatana kakuhuka hajita kana. Kaha muchakumwenesa chamakumishilo, Yowano amwene mwilu muli kuunda, nahano hamavu nawa. Satana navatu jenyi vosena vavanongesele ndolokoto. Vosena vaze vatwama mwilu navaze vatwama hano hamavu vanajilila lijina lyaYehova nakulemesa kaha ikiye.