Chimoteu apwile mukweze walunga uze apwile muchikungulwilo chamuLusutala. Ise apwile kaHelase, kaha naye apwile kaYuleya. Ngocho, Chimoteu vamunangwile vyaYehova halwola apwile kanyike kuli naye Yunese nakaka yenyi Lowise.

Omu Paulu ayile nakwambulwila kuLusutala haungeji wenyi wamuchivali, amwene ngwenyi Chimoteu azangile chikuma vandumbwenyi muchikungulwilo kaha nawa apwile namuchima wakufwila kuvakafwa. Paulu ambachile Chimoteu mangana ayenga nenyi hamwe. Paulu anangwilenga Chimoteu mangana apwenga muka-kwambulula mujimbu wamwaza, kaha nawa muka-kunangula wakwipangweji.

Shipilitu yajila yatwaminyinyinenga Paulu naChimoteu kwosena kuze vayilenga. Ufuku umwe, Paulu amwene lunga umwe muchakumwenesa anakumulweza ayenga kuMasetonya nakukafwa vatu. Ngocho, Paulu, naChimoteu, naShilase naLuka vayileko nakwambulula nakutunga vikungulwilo.

Vatu vavavulu vapwile jino vaka-Kulishitu munganda yaMasetonya yize yapwile muTesolonyika. Chipwe ngocho, vaYuleya vamwe vevwilile lwiso Paulu namasepa jenyi vaze ayile navo. Ngocho, vakatwile liuya munganda nakukunyula vatu vakuhuka mangana vakwate Paulu navakwavo nakuvatwala kuli vaka-kuyula, nakuvavangijikila ngwavo: ‘Ava malunga vosena vanapu vaka-kole kufulumende yaLoma!’ Hakuwana nge chiyoyelo chaPaulu naChimoteu chapwile muponde, ngocho vachinyine naufuku nakuya kuMbeleya.

Vatu vamuMbeleya vafwililile kulinangula mujimbu wamwaza, kaha vaHelase, navaYuleya vapwile jino vaka-kwitava. Oloze omu vaYuleya vamwe vejile kufuma kuTesolonyika, vanehele vikokojola ngocho Paulu ayile kuAtene. Jino Chimoteu naShilase vasalile muMbeleya nakukolezeza vandumbwavo. Kutwala muze, Paulu atumine Chimoteu ayenga kuTesolonyika mangana akakafwe vandumbwavo vapwile nakuhita muluyanjisa. Kufumaho Paulu atumine Chimoteu kutambukila vikungulwilo vyeka nakukolezeza vandumbwavo.

 Paulu alwelezele Chimoteu ngwenyi: ‘Vosena vaze vafwila kuzachila Yehova navavayanjisanga.’ Ngocho Chimoteu vamuyanjishilenga nakumukasa mukamenga mwomwo yalufwelelo lwenyi. Awahililile chikuma hakutachikiza ngwenyi, apwile wakushishika kuli Yehova.

Paulu alwezele vaka-Fwilipi ngwenyi: ‘Nangumitumina Chimoteu, mangana aminangule mwalumbunukila kutambuka mumuchano, nakuminangula nawa mwakwambulwila.’ Chikupu vene Paulu afwelelele chikuma Chimoteu. Hakuwana nge vapwile vaka-kuzachila hamwe, kaha nawa vatungile usepa wamwenemwene, ngocho vazachilililenga hamwe hamyaka yayivulu.