Yehova ashika ngwenyi: ‘Kakweshi kukapwa kulila, nakukola, namisongo, chipwe kufwako. Nangukahunda masoji osena kumeso avo. Kaha vyuma vyavipi vyakunyima vatu kaveshi kukavyanukako.’

Yehova ahakile Alama naEve mumilemba yaEtene mangana vatwamenga mukuunda nakupwa vakuwahilila. Vatelelele kulemesa kaha Sevo wamwilu nakuzalisa hano hamavu navana vavo. Numba tuhu, Alama naEve valikangile kuli Yehova, oloze kavahonesele kujina chenyiko. Mumukanda uno tunamono ngwetu Yehova eji kutesangamo vyuma vyosena eji kushikanga. Wangana wenyi naukaneha vyuma vyamwaza hano hamavu, ngana muze Yehova ashikile Apalahama.

Kalinwomu vafumiseko Satana, navandemone jenyi, navatu vakuhuka. Vatu vosena vaze navakayovoka navakalemesanga Yehova. Katweshi kukaviza chipwe kufwako. Hakumbi hakumbi, natukahindukanga nangolo, kaha natukawahililanga hakupwa tuvavatonyi. Mavu nawakapwa palachise. Vatu vosena navakapwa navyakulya najizuvo jakukingiwa. Kaha  nawa, vatu navakapwa valikoji, keshi vaka-ukenyako. Tunyama vamuchipapa kaveshi kukevwa woma vatuko, kaha nawa etu katweshi kukevwanga woma tunyama kanako.

Natukawahilila chikuma omu Yehova mwakaputuka kusangula vafu. Natukasambilila vatu vaze vafwile kushikulu vakufwana nge Avele, naNowa, naApalahama, naSala, naMose, naLute, naEseta naNdavichi. Natukazachila navo hamwe hakuwahisa mavu kupwa palachise. Ngocho, nakukapwa milimo yamwaza yayivulu yize natukalivwisa kuwaha kuzata.

Yehova ali nakusaka nayove ukapwemo. Naukatachikiza kanawa jijila jaYehova josena. Shikaho twatela kupandama lika kuli Yehova hakumbi hakumbi, oholyapwa, nahaya myaka yosena!