Saulu apwile kaLoma uze asemukilile kuTalasu. Apwile kaFwaliseu uze atachikijile chikuma Jishimbi javaYuleya, kaha nawa ajinjile vaka-Kulishitu. Akwachilenga vaka-Kulishitu vamalunga namapwevo nakuvakasa mukamenga. Omu vatu vapwile nakwasa malolwa kambaji Setefwano nakumujiha, ikiye alimwenenene nameso enyi kapu.

Hakuwana nge, Saulu kasuulukile kuyanjisa vaka-Kulishitu vaze vatwaminenga muYelusalema kahako, ngocho, alombele kapilishitu wakulitulaho amutume kunganda yaNdamashiku mangana akayanjise vaka-Kulishitu vamunganda kana. Omu Saulu ahetele kwakamwihi nanganda, akasumukile mumunyi unamunyika hosena haze apwile, ngocho alimbukile hamavu. Kaha evwile lizu nalihanjika ngwalyo: ‘Ove Saulu, uli nakunguyanjishila ika?’ Jino Saulu ahulishile ngwenyi: ‘Yove iya?’ Kaha lizu lyambile ngwalyo: ‘Yami Yesu. Yako kuNdamashiku, kaha navakakulweza vyuma watela kulinga.’ Hahaze vene, meso aSaulu elavile, kaha vamukwachile kulivoko nakumutwala munganda kana.

Munganda yaNdamashiku mwapwile muka-Kulishitu wakushishika walijina lyaAnanyiya. Jino Yesu alwezele Ananyiya muchakumwenesa ngwenyi: ‘Yako kuzuvo yaYuta mumukwakwa uze vavuluka ngwavo Kwoloka, mangana ukawane Saulu.’ Kaha ikiye ambile ngwenyi: ‘Ove Mwata, mutu kana ngwamutachikiza. Eji kukasanga tumbaji twove nakuvatwala mukamenga.’ Chipwe ngocho, Yesu amulwezele ngwenyi: ‘Yako kuli ikiye. Mwomwo ngunasakula Saulu apwenga muka-kwambulula mujimbu wamwaza kumafuchi amavulu.’

Omu Ananyiya ayile, awanyine Saulu kaha amulwezele ngwenyi: ‘Saulu ndumbwami, Yesu nangutumu ngutonese meso ove.’ Hahaze vene, Saulu aputukile kumona cheka. Alinangwile vyaYesu, ngocho apwile jino muka-kumukavangiza. Omu Saulu vamumbapachishile aputukile kwambulula mujisunangonga hohamwe navaka-Kulishitu vakwavo. Achishinganyeke omu vevwile vaYuleya  hakumona Saulu ali nakunangula vatu hali Yesu? Vambile ngwavo: ‘Uno ou keshi mutu uze akwachilenga tumbaji twaYesuko nyi?’

Saulu ambulililenga vatu vamuNdamashiku hamyaka yitatu. Echi chalingishile vaYuleya vajinde Saulu nakutondatonda jila yakumujihilamo. Oloze vandumbwenyi vatachikijile ngwavo vali nakusaka kumujiha, ngocho vamukafwile mangana achine. Vamuhakile mumutonga nakumulondwesa mulihanya lyahakembwe nakumulowela kuweluka.

Omu Saulu ayile kuYelusalema asakile kuzachila hamwe navandumbwenyi, oloze vamwivwilenga woma. Kufumaho, kambaji umwe walikoji walijina lyaMbalanape atwalile Saulu kuli vaposetolo nakuvalweza ngwenyi, Saulu nalumuka. Ngocho, Saulu aputukile jino kwambulula mujimbu wamwaza natwima hamwe kaha navandumbwenyi muchikungulwilo chamuYelusalema. Kutwala muze, vamuvulukilenga jino ngwavo Paulu.