Likumbi limwe omu Eve apwile ukawenyi, linoka ahanjikile kuli ikiye. Uze linoka ambile ngwenyi: ‘Uno chikupu vene Kalunga namikanyisa kulya kumitondo yoseneyi tahi?’ Eve ambile ngwenyi: ‘Tunahase tuhu kulya kumihako yamitondo yosena, kufumisako mutondo umwe kaha. Nge natulya kumihako yamutondo kana natufwa.’ Kaha uze linoka ambile ngwenyi: ‘Kamweshi kufwako. Oloze nge namulya kumutondo kana, namupwa nge Kalunga.’ Uno mazu kana apwile amuchano tahi? Nduma, mazu kana apwile amakuli. Chaluvinda, Eve etavilile mazu kana. Kaha atalilenga lika kumuhako, echi chamulingishile mangana evwile kuwaha uze muhako. Ngocho alile muhako kana, kufumaho ahanyineko naAlama. Alama naikiye atachikijile ngwenyi, nge navalikanga kuli Kalunga kaha navafwa. Chaluvinda, Alama naikiye alile kuli uze muhako.

Halikumbi vene lize, Yehova ahanjikile kuli Alama naEve nakuvahulisa vamulweze ovyo vyavalingishile valikange kuli ikiye. Eve ahanyine mulonga linoka, kaha Alama ahanyine mulonga Eve. Hakuwana nge Alama naEve valikangile kuli Yehova, ngocho avahangile muze mumilemba. Hakusaka mangana avahonese kukinduluka muze mumilemba, Kalunga ahakile vangelo napoko yamukwale yakukwata mulangi wakakahya kuchikolo chamilemba.

Yehova ambile cheka ngwenyi nauze nawa ongele Eve navakamuzangamisa. Uze linoka keshi ikiye ahanjikile naEveko. Yehova katengele manoka nauhashi wakuhanjikako. Kangelo wamupi ikiye alingishile uze linoka ahanjike. Alingile ngocho mangana ongenga Eve. Lijina lyauze kangelo ikiye Satana Liyavolo. Kulutwe Yehova mwakanongesa Satana mangana akahone kwonga cheka vatu kulinga vyuma vyavipi.