Omu Alama naEve valingile hivanafumu lyehi mumilemba yaEtene, vasemene vana vavavulu. Mwanavo watwatwa Kena, apwile njimi kaha wamuchivali Avele apwile kafunga.

Likumbi limwe Kena naAvele vahanyine wana kuli Yehova. Uno watachikiza wana kana tahi? Wapwile wana wakulipwila. Yehova evwililile kuwaha wana ahanyine Avele, oloze kevwililile kuwaha wana waKenako. Echi chalingishile Kena evwenga matoto. Yehova ahuhumwine Kena, hakumulweza ngwenyi matoto enyi nawamulingisa alinge vyuma vyavipi. Oloze Kena kevwililile vyuma vamuhuhumwineko.

 Kena ambile kuli songo yenyi Avele ngwenyi: ‘Tuyenga muchipapa.’ Omu vapwile muchipapa uka wavo, Kena avetele songo yenyi nakumujiha. Vyuma muka alingile Yehova hakumona chuma kana? Yehova azangamishile Kena hakumuhanga afume mutanga ayenga nakutwama kwakusuku natanga yenyi. Ngocho Kena kavamwitavishile akinduluke cheka kutangako.

Chishina muka natulinangulaho? Tunahase kwivwa matoto nge vyuma tunakushinganyeka chipwe vize tunakusaka kavyateselemoko. Nge tunapihilila havyuma vimwe, chipwe nge vakwetu vanatuhuhumuna mwomwo yakutachikiza ngwavo tunapihilila, twatela kwalumuna vishinganyeka vyetu nakuzachilaho.

Avele azangile chikuma Yehova nakulinga vyuma vyakwoloka, ngocho Yehova mwamwanukanga. Shikaho, Kalunga mwakasangula Avele halwola mwakalingisa mavu kupwa palachise.