Mukuhita chalwola, vatu vavulile chikuma hano hamavu. Ngocho vatu vavavulu vapwile vavilinga vyavipi. Kaha vangelo vamwe mwilu vejile nakupwa navilinga vyavipi, vafumine mwilu muze vatwaminenga nakwiza hano hamavu. Unatachikiza ovyo vyavalingishile vezenga hano hamavu tahi? Vejile mangana vavwale mijimba yautu nakumbata mapwevo.

Vaze vangelo vambachile mapwevo nakusema navo vana vamalunga. Vaze vana vapwile nangolo chikuma kaha vapwile nakuyanjisa vatu. Yehova kasakile ulyanyi utwaleho likako. Ngocho ajinyine kunongesa vatu vavilinga vyavipi naLivaji.

Kwapwile lunga umwe uze apwile navilinga vyamwaza. Azangile Yehova. Lijina lyenyi ikiye Nowa. Apwile napwevo lyenyi navana vamalunga vatatu, majina avo vakiko Sheme, naHame naYafwete, ava vana navakiko vambachile mapwevo javo. Yehova alwezele Nowa asonge wato mangana ikiye natanga yenyi vengilemo nakuyovoka kuLivaji. Wato kana wapwile nge chikasha chachinene chize nachihasa kufungumuka hameya. Yehova amulwezele nawa ngwenyi, engise tunyama vavavulu muwato mangana navakiko vayovoke.

Hahaze vene Nowa aputukile kusonga wato. Mwahichile myaka 50 numba jino Nowa natanga yenyi vakumise kusonga wato. Vasongele wato kweseka namuze avalwezele Yehova. Nowa ahuhumwinenga nawa vatu vyakwiza chaLivaji. Chipwe ngocho, naumwe wauchi evwililile kuli ikiye.

Kutwala muze, lwola lwahetele jino lwakwingila muwato. Mana utale vyuma vyakavangijileho.