Nowa natanga yenyi, natunyama vengilile muwato. Kufumaho Yehova asokele chikolo chawato, kaha vula yaputukile kunoka. Vula yanokele chikuma ngocho wato waputukile kufungumuka. Kutwala muze meya azalile hamavu hosena. Vatu vosena vavilinga vyaulyanyi vafwile. Oloze Nowa natanga yenyi vaze vapwile mukachi kawato vayovokele. Achishinganyeke, ocho kuwaha vevwile hakwononoka Yehova!

Vula yanokela hamakumbi 40 musana naufuku, kaha yachele. Kutwala muze meya aputukile kutepuluka chikoki chikoki. Ngocho wato watwamine hajipili. Hakuwana nge meya azalile hamavu hosena, ngocho Nowa natanga yenyi kavalovokele muwato hahaze veneko.

Mukuhita chalwola meya aputukile kutepuluka chikoki chikoki. Nowa natanga yenyi vatwamine muwato lwola lwalusuku lwakuhambakana mwaka wamuundu. Kaha Yehova avalwezele valovoke muwato. Nowa natanga yenyi vahanyine Yehova wana wakumusakwilila hakuvayovola.

Yehova awahililile hawana vamuhanyine. Kaha ashikile ngwenyi keshi kukanongesa cheka vyuma vyakuyoya vyosena hano hamavu nalivajiko. Ngocho ahakileko kongolo kupwa chinjikizo chize nachisolokanga hamavwi. Uno wamonaho lyehi kongolo tahi?

Kufumaho, Yehova alwezele Nowa natanga yenyi vaseme vana nakuzalisa hano hamavu.