Lote atwaminenga nanatwenyi Apalahama mulifuchi lyaKanane. Hakuwana nge Apalahama naLote vapwile jino navimuna vavavulu, ngocho chihela chakutwama vosena hamwe chakehele. Apalahama alwezele Lote ngwenyi: ‘katweshi kuhasa kuyoyela muchihela chimweko. Shikaho tulihandunune. Sakulaho, nge muya kuchimoswe, kahami nanguya kuchilyo, oloze nge muya kuchilyo, kahami nanguya kuchimoswe,’ Apalahama asolwele chikupu muchima wakuhona kulizanga yivene, nyi mweka?

Lote amwene ngalila yamwaza yize yapwile kwakamwihi nanganda yaSotome. Ngalila kana yapwile nameya amavulu namwila. Ngocho asakwile ngalila kana kaha ayile nakutwama kuze natanga yenyi.

Vatu vamunganda yaSotome naNgomola vapwile navilinga vyavipi. Echi chikiko chalingishile Yehova ajine kunongesa eji jinganda. Chipwe ngocho, Kalunga asakile kuyovola Lote natanga yenyi, atumine vangelo vavali vayenga nakumulweza ngwavo: ‘Katukenu. Fumenu muchihela chino mwomwo Yehova mwanongesa nganda yino.’

Lote kakatukile hahaze veneko, apwile lika nakulangisa. Ngocho vaze vangelo vakwachile kulivoko lyenyi nakulivoko lyapwevo lyenyi nakumavoko avana venyi vamapwevo vavali, kaha vamulowele nakumutwala kuweluka wanganda nakwamba ngwavo: ‘China ulwile mwono wove. Kanda utala kunyimako, nge mutala kunyima mufwa.’

 Omu vahetele munganda yaZowale, Yehova anokesele vula yasulufulu nakakahya haSotome naNgomola. Jize jinganda josena jivali vajinongesele. Omu pwevo lyaLote alikangile kuli Yehova nakutala kunyima, alumukile kaumbu kamungwa. Oloze Lote navana venyi vayovokele mwomwo vononokele Yehova. Chasoloka nge Lote navana venyi vevwile kupihya omu ou pwevo alikangile. Chipwe ngocho, vawahilile chikuma hakwivwilila kujindongi jaYehova.