Apalahama anangwile mwanenyi Isaka kuzanga Yehova namuchima wenyi wosena, nakufwelela jishiko jaYehova josena. Oloze omu Isaka ahetesele myaka yakusemuka 25, Yehova alwezele Apalahama alinge chuma chize chapwile chachikalu kulinga. Chuma muka vene ocho?

Kalunga alwezele Apalahama ngwenyi: ‘Mbata mwanove umwe kaha lyamunwe Isaka, ukamuhane kupwa wana wakulumba hapili, kungalila yaMoliya.’ Numba tuhu Apalahama katachikijile kanawa ovyo Yehova amulwezelele kulinga chuma kanako, oloze ononokele lika Yehova.

Lichako nachimene, Apalahama ayile naIsaka navangamba jenyi vavali kungalila yaMoliya. Omu mwahichile makumbi atatu, vaputukile kumona pili hahasuku. Apalahama jino alwezele vangamba jenyi vasale nakuvandamina omu ikiye naIsaka navaya nakuhana wana. Apalahama ahanyine Isaka jikunyi mangana ambate, kaha ikiye ambachile poko. Isaka ahulishile ise ngwenyi: ‘Uno mukoko wawana wakulumba ali kulihi?’ Apalahama amukumbulwile ngwenyi: ‘Ove mwanami, Kalunga mwatuhana wana kana.’

Omu vahetele kupili, vatungile lijiko lyakulumbila. Apalahama akashile Isaka kumavoko nakumahinji nakumusavalika halijiko lyakulumbila.

Apalahama ambachile poko. Kaha hahaze vene kangelo kaYehova ahanjikile kufuma mwilu ngwenyi: ‘Kanda ujiha ou mukwezeko, mwomwo ngunatachikiza jino ngwami umuka-kufwelela Kalunga hakuwana nge kawakanyine kunguhana ou mwanoveko.’ Kufumaho, Apalahama  amwene chizamba chamukoko hahasuku naliswiki jimbinga mulifufwa. Hahaze vene akasunwine Isaka nakulumba chizamba chamukoko.

Kufuma halikumbi vene lize, Yehova avulukile Apalahama ngwenyi sepa lyenyi. Mwomwo ika alingililile ngocho? Mwomwo Apalahama etavilile kulinga vyuma vyosena amulwezele Yehova, numba tuhu shimbu jimwe katachikijile ovyo Yehova amulwezelele kulinga vyuma kanako.

Yehova ahanjikile cheka lushiko ashikile Apalahama ngwenyi: ‘Ngocho nangukakukisula chikupu nakuvulisa vana vove, chipwe vaka-tanga yove.’ Echi chalumbununa nge Yehova mwakakisula vatu vosena vavilinga vyamwaza kuhichila mutanga yaApalahama.