Apalahama naSala vatwamine muulo hamyaka yayivulu. Vasezele zuvo yavo yamwaza muUle nakuya nakutwama mumbalaka. Chipwe ngocho Sala kayayavalileko mwomwo afwelelelele Yehova.

Sala afwililile kupwa namwana, ngocho alwezele Apalahama ngwenyi: ‘Kachi nge ndungo yami Hangale mwapwa namwana, kaha nachipwa kwijiva nge mwanami.’ Mukuhita chalwola Hangale asemene mwana kaha vamulukile ngwavo Ishimele.

Omu Apalahama apwile namyaka yakusemuka 99, Sala apwile namyaka yakusemuka 89, kaha vangeji vatatu vavatambukilile. Apalahama avatambwile nachisambo nakutwama navo mwishi yamutondo, kaha avahanyine vyakulya. Uno ava vangeji vapwile veya? Vapwile vangelo. Valwezele Apalahama ngwavo: ‘Mwaka nawizaho halwola vene luno, puwove mwakasema mwana walunga.’ Sala apwile nakuvevwilila omu apwile mumbalaka. Ngocho Sala aputukile kusehela mumuchima wenyi nakwamba ngwenyi: ‘Kutala ngunahase kupwa namwana okunyi ami ngunashinakaja lyehi?’

Mwaka wakavangijileho, Sala asemene mwana walunga kweseka namuze ashikile kangelo kaYehova. Kaha Apalahama amulukile lijina ngwenyi Isaka kulumbununa “Miselo.”

 Omu Isaka apwile namyaka yakusemuka 5, Sala amwene Ishimele mwahenda Isaka. Ngocho hakusaka mangana akinge mwanenyi Isaka, Sala alwezele Apalahama ahange Hangale namwanenyi. Hakavanga Apalahama kasakile kumuhangako. Oloze Yehova alwezele Apalahama ngwenyi: ‘Ivwilila vyuma ali nakukulweza Sala. Ishimele Nangumuzakama yami. Mwomwo muli Isaka mukiko nangukateselamo jishiko jami.’