Hanyima yaLivaji vana vaNowa namapwevo javo vasemene vana vavavulu. Tanga yavo yatohwele chikuma, kaha vaputukile kuya nakutwama kuvihela vyakulisezaseza vyahamavu, ngana muze avalwezele Yehova.

Chipwe ngocho, vatu vamwe mujitanga kavononokele Yehovako. Ngocho vambile ngwavo: ‘Twayenu tutunge nganda yetu nakaposhi kaze nakaheta mwilu, kaha natufumakanyisa lijina lyetu.’

 Yehova apihililile navyuma vapwile nakulinga vatu, ngocho ajinyine kuhonesa vatu kana kuzata mulimo wavo. Unatachikiza vyuma alingile tahi? Aluwanganyishile lilimi lyavo nakuvalingisa vaputuke kuhanjika malimi akulisezaseza. Hakuwana nge mutu himutu kevwilenga lilimi ahanjikilenga mukwavoko, ngocho valitwaminyine kutunga Kaposhi. Shikaho nganda yize vapwile nakutunga vayivulukilenga jino ngwavo Mbavele, kulumbununa “Kuluwangana.” Vatu vaputukile kulimwanga nakuya nakutwama kuvihela vyahamavu vyakulisezaseza. Chipwe ngocho valingilenga vyuma vyavipi kuvihela kuze vatwaminenga. Uno kwapwile vatu vamwe vaze vazangilenga Yehova tahi? Chihula kana vanachikumbulula muchilongesa chinakavangizaho.