Yehova ashikile Yakova ngwenyi mwamukinga, ngana muze akingile Apalahama naIsaka. Yakova atwaminenga kuHalane, kuze ambachilile pwevo nakupwa naluheto lwaluvulu.

Kutwala muze Yehova alwezele Yakova ngwenyi: ‘Kinduluka kulifuchi lyove.’ Ngocho Yakova natanga yenyi vakatukile nakuputuka kuya ungeji wausuku. Vatu vamwe vaze vawanyine Yakova mujila vamulwezele ngwavo: ‘Tunawane yayove Esau, ali nakwiza hamwe namalunga 400.’ Yakova evwile woma mwomwo ashinganyekele ngwenyi Esau ali nakusaka kumujiha hohamwe natanga yenyi. Ngocho alombele kuli Yehova ngwenyi: ‘Nguyovole mumavoko ayayami.’ Likumbi lyakavangijileho Yakova atuminyinyine Esau mikoko vavavulu, navapembe, navangombe, navangamela, navimbulu, kupwa wana.

Likumbi vene lize naufuku, omu Yakova apwile ukawenyi amwene kangelo. Uze kangelo alipikile nenyi palanga nomu kwachele. Numba tuhu Yakova alikolesele, oloze kazeyeleko. Uze kangelo amulwezele ngwenyi: ‘Ngweche nguyenga.’ Oloze Yakova amulwezele ngwenyi: ‘Kangweshi kukwecha uyengako kuvanga unangukisula.’

Kutwala muze, uze kangelo akiswile jino Yakova. Ngocho Yakova atachikijile jino ngwenyi Yehova keshi kwechelela Esau amujiheko.

Omu kwachele nachimene, Yakova andwile meso enyi kaha amwene Esau namalunga 400 omu vapwile hahasuku naikiye. Yakova asezele tanga yenyi kunyima nakulivanga  mangana ayenga nakulifukula kuli ndumbwenyi Esau mapapa 7. Esau alahile nakusesa Yakova nakumupakata mukasamba. Ava vasongo namukulwane valilile nakulikasa jino chivwasano chakutwama mukuunda. Unashinganyeka ngwove Yehova evwile ngachilihi hakumona Yakova mwakumisa vikokojola?

Kufumaho, Esau akindulukile kwimbo lyenyi, kaha Yakova nawa ayile kwimbo lyenyi. Yakova apwile navana vamalunga 12. Majina avo vapwile Luvene, naShimeyone, naLevi, naYuta, naNdane, naNafwatale, naNgate, naAshele, naIsakale, naZevulune, naYosefwe naMbenjamine. Kaha mwanenyi Yosefwe vamuzachishile kuli Yehova mangana ayovole vatu. Uno unatachikiza ovyo Yehova alingililile ngocho tahi? Mana utale.