Mose naAlone vayile nakulweza Fwalo mujimbu wakufuma kuli Kalunga ngwavo: ‘Nge kaweshi kusuula vatu jami, kaha nanguneha vikesu mulifuchi lyosena.’ Ngocho vikesu vavavulu vaputukile kwingila mujizuvo javaEjipitu josena. Mulifuchi lyosena mwapwile vikesu. Oloze mungalila yaNgoshene muze vatwaminenga vaIsalele kamwapwile chikesu numba umweko. Echi chipupu chamuchiwana navyeka vyakavangijileho vyejile kaha hali vaEjipitu. Ngocho Fwalo alwezele Mose naAlone ngwenyi: ‘Lembelelenu Yehova mangana afumiseko ava vikesu. Kaha nangusuula vatu jenu.’ Oloze omu Yehova afumishileko vaze vikesu, Fwalo alumwine cheka vishinganyeka vyenyi. Uno Fwalo alinangwileko chishina chachilemu tahi?

Yehova ambile ngwenyi: ‘Nge Fwalo mwahona kusuula vatu jami, kaha vimuna javaEjipitu navaviza nakufwa.’ Likumbi lyakavangijileho vimuna vaputukile kufwa. Oloze vimuna javaIsalele kavafwileko. Chipwe ngocho, Fwalo akaluhwishile lika muchima wenyi nakuhona kuvasuula.

Yehova alwezele Mose ayenga kuli Fwalo nakwasa uto mwilu. Uze uto walumukile nakupwa lukungu mulifuchi lyaEjipitu lyosena. Luze lukungu lwanehele mahute amapi hali vatu vamuEjipitu navimuna javo vosena. Chipwe ngocho, Fwalo akanyine kusuula vaIsalele.

Yehova atumine cheka Mose kuli Fwalo nakumulweza ngwenyi: ‘Kutala uchili lika nakukana kusuula vatu jami vayenga tahi? Hamene nakukanoka  vula yayinene yamalolwa.’ Likumbi lyakavangijileho, Yehova anokesele vula yamalolwa, yamikalateta nakakahya. Eyi yapwile vula yayinene chikuma yize kanda yinokengaho lyehi muEjipitu. Mitondo navyuma vyakusoka hamavu vyalyenyekele, oloze vyuma kana kavyalyenyekele mungalila yaNgosheneko. Kaha Fwalo ambile ngwenyi: ‘Lembelelenu Yehova mangana vula yechenga kunoka, kaha namuya.’ Oloze omu yechele kunoka, Fwalo alumwine vishinganyeka vyenyi nakukana kuvasuula.

Jino Mose ambile ngwenyi: ‘Vambimba navalya vyuma vyakusoka hamavu vyosena vize vyasalileho omu yanokele vula yamalolwa.’ Vambimba vavulile chikuma kaha valile vyuma vyakusoka hamavu navize vyapwile kumitondo. Fwalo ambile ngwenyi: ‘Lembelelenu Yehova mangana afumiseko ava vambimba.’ Numba tuhu Yehova afumishileko ava vambimba, oloze Fwalo akanyine kusuula vaIsalele.

Yehova alwezele Mose ngwenyi: ‘Olola livoko lyove mwilu.’ Hahaze vene mulifuchi mwapwile milima. VaEjipitu kavamwene kala chumako hamakumbi atatu. Oloze kuli vaIsalele kwapwile musana.

Fwalo alwezele Mose ngwenyi: ‘Yenu navatu jenu. Oloze sezenu vimuna jenu.’ Mose ambile ngwenyi: ‘Twatela kumbata vimuna jetu mangana tukavahane kupwa wana kuli Kalunga ketu.’ Fwalo apihililile nakwamba ngwenyi: ‘Fuma kuli ami. Kanda ukeza cheka kuli amiko kuchina nangukakujiha.’