VaIsalele vavashinjililile vazate chikuma hakupwa vandungo. Yehova atumine Mose naAlone vayenga kuli Fwalo nakumulweza ngwavo Yehova nambe ngwenyi: ‘Suula vatu jami vayenga mupambo nakungulemesa.’ Fwalo alivwimbile nakwamba ngwenyi: ‘Yehova ikiye iya numba ngumwononoke, kangweshi kusuula vaIsalele mangana vayengako.’ Kaha Fwalo avashinjililile vazate milimo chikuma. Yehova mwafwila kuzangamisa Fwalo. Unatachikiza omu Yehova azangamishile Fwalo tahi? Anehele Vipupu 10 hali vaEjipitu. Yehova alwezele Mose ngwenyi: ‘Fwalo kate kungwivwilila. Ngocho, hamene nachimene mwakaya kuKalwiji Nyile. Yako ukamulweze ngwove, hakuwana nge kawasuwile vatu jamiko, meya amukalwiji Nyile nawalumuka nakupwa manyinga.’ Mose ononokele Yehova nakuya kuli Fwalo. Kaha Fwalo amwene nameso enyi kapu omu Alone avetele mbwechi yenyi hameya nakwalumuka kupwa manyinga. Meya aputukile kunuka, vaishi nawa vafwile, ngocho kakwapwile meya amwaza akunwa muKalwiji Nyileko. Fwalo akanyine lika kusuula vaIsalele.

 Omu mwahichile makumbi 7, Yehova atumine Mose akinduluke kuli Fwalo nakumulweza ngwenyi: ‘Nge kaweshi kusuula vatu jami vayengako, kaha nanguneha vizunda muEjipitu.’ Alone ambachile mbwechi yenyi nakwolola livoko lyenyi, kaha vizunda vazalile mulifuchi lyosena. Vatu vawanyine vizunda mujizuvo javo, nahatuhela twavo, nahamalonga avo. Chikupu vene vizunda vavulile chikuma. Fwalo alwezele Mose alembelele Yehova afumiseko vizunda, kaha nawa alitavilile ngwenyi mwasuula vaIsalele vayenga. Ngocho Yehova afumishileko echi chipupu, kaha vaEjipitu vaputukile kukungulula vizunda nakuvalumbika milumba milumba. Kaha lifuchi lyosena lyanukile. Oloze Fwalo akaluhwishile muchima wenyi nakuhona kusuula vaIsalele vayenga.

Kufumaho, Yehova alwezele Mose ngwenyi: ‘Alone avete mbwechi yenyi hamavu, kaha lukungu nalwalumuka kupwa tungunungunu chipwe tututu vamwe vakusumana.’ Hahaze vene tungunungunu vavulile chikuma. Vatu jaFwalo vamwe vamulwezele ngwavo: ‘Ava tututu vanafumu kuli Kalunga.’ Chipwe ngocho, Fwalo kasuwile vaIsaleleko.