Halwola Yosefwe apwile mukamenga, mwangana waEjipitu Fwalo alotele vilota vize kavahashile kulumbununa kuli kala mutuko. Kaha ngamba yenyi umwe amulwezele ngwenyi Yosefwe ikiye nahase kulumbununa vilota kana. Hahaze vene Fwalo atumine vatu vayenga nakusaka Yosefwe.

Fwalo amuhulishile ngwenyi: ‘Uno unahase kulumbununa vilota vyami tahi?’ Yosefwe alwezele Fwalo ngwenyi: ‘Mulifuchi lyaEjipitu namukapwa vyakulya vyakulisala hamyaka 7, kaha kufumaho namukapwa zala yakalombolombo hamyaka 7. Sakula mutu wamangana uze mwakungulula vyakulya nakuvilama mangana vatu vakahone kufwa zala.’ Fwalo ambile ngwenyi: ‘Nangusakula vene yove. Yove mupwa mutu wamulemu chikuma muEjipitu, yami kaha nangukuhambakana.’ Uno Yosefwe ahashile ngachilihi kulumbununa vilota vyaFwalo? Yehova ikiye amukafwile.

Hanyima yakumusakula, Yosefwe akungulwile vyakulya hamyaka 7. Kutwala muze hamavu hosena hapwile zala yakalombolombo ngana muze ahanjikile chimweza Yosefwe. Vatu vakumafuchi akulisezaseza vejilenga nakulanda vyakulya kuli Yosefwe. Omu ise Yakova evwile ngwavo muEjipitu muli vyakulya, atumine vana venyi 10 kuya nakulanda vyakulya.

Vana vaYakova vayile nakulanda vyakulya kuli Yosefwe. Hahaze vene avatachikijile. Oloze vayaya jenyi kavamutachikijileko, kaha nawa valifukwile kuli ikiye ngana muze alotelenga omu apwile kanyike. Yosefwe asakile kutachikiza numba nge vayaya jenyi vamujinjile lika. Ngocho ambile kuli vakiko ngwenyi: ‘Enu muvandoji. Munakusaka kusondwesa lifuchi lyetu.’ Vambile ngwavo: ‘Nduma. Twasemuka malunga 12, kaha  twafumu kulifuchi lyaKanane. Ndumbwetu umwe walunga afwa lyehi, kaha kasulasongo ketu nasale kuli tata.’ Yosefwe ambile ngwenyi: ‘Kangunehelenu kasulasongo kenu numba nguketavile vyuma munahanjika.’ Ngocho vakatukile nakuya kuli sevo.

Omu vyakulya vyakumine, Yakova atumine cheka vana venyi vakalande vyakulya kuEjipitu. Aha hakiko jino vayile nakasulasongo kavo Mbenjamine. Hakusaka mangana eseke vandumbwenyi, Yosefwe aswekele lupasa lwenyi lwapalata munjeke yaMbenjamine yavyakulya mangana ambenga ngwenyi vanevi. Omu vangamba jaYosefwe vawanyine lupasa munjeke yaMbenjamine, vayaya jenyi valikomokelele chikuma. Ngocho, valembelelele Yosefwe avazangamise muchishishisa chakuzangamisa Mbenjamine.

Yosefwe atachikijile ngwenyi vandumbwenyi vanalumuka nakupwa namichima yamwaza. Kaha ushona wamukwachile chikuma nakuputuka kulila nakwamba ngwenyi: ‘Yami vene ndumbwenu Yosefwe. Uno tata achili wamutonyi tahi?’ Vandumbwenyi valikomokelele chikuma. Kaha avalwezele ngwenyi: ‘Kanda namwivwa kupihya mwomwo yavyuma mwalingile. Kalunga ikiye angutumine kuno mangana nguyovole myono yenu. Shikaho yenu mangana mukasake tata ezenga kuno.’

Ngocho vakindulukile kwimbo nakulweza sevo mujimbu kana mangana vamutwale kuEjipitu kuli Yosefwe. Numba tuhu mwahichile myaka yayivulu, oloze Yosefwe naise vatwamine cheka hamwe.