Omu Fwalo evwile ngwavo vaIsalele vanafumu muEjipitu, alumwine vishinganyeka vyenyi mangana avakindulwise. Alwezele vangamba jenyi ngwenyi: ‘Mbatenu matemba ami ajita osena mangana tuvahangasane. Katwatelanga kuvasuula vayengako.’ Fwalo navatu jenyi vaputukile kuhangasana vaIsalele.

Yehova apwile nakutwaminyina vatu jenyi kuzachisa livwi namusana, kaha naufuku azachishilenga kakahya. Avatetekelele palanga nakuKalungalwiji Uchila nakuvalweza vatunge chilombo.

Kutwala muze vaIsalele vamwene Fwalo namaswalale jenyi vali nakuvahangasana. Ngocho vaIsalele vapwile mukachi oku kalungalwiji oku maswalale javaEjipitu. Kaha vatetele kuli Mose nakwamba ngwavo: ‘Natufwa. Watelanga kutwecha tutwame muEjipitu.’ Oloze Mose ambile ngwenyi: ‘Kanda namwivwa womako. Vandaminenu mumone omu Yehova mwatulwila.’ Chikupu vene Mose afwelelele Yehova, nyi mweka?

Yehova alwezele vaIsalele vafume hachilombo. Haufuku vene uze Yehova ahakile livwi mukachi kavaEjipitu navaIsalele. Kaha kuze vapwile vaEjipitu kwapwile milima, oloze kuze vapwile vaIsalele kwapwile musana.

 Yehova alwezele Mose olole livoko lyenyi hakalungalwiji. Kufumaho, Yehova ahuhwishile peho yayinene ufuku wosena. Ngocho meya akalungalwiji alihandunwine muvihanda vivali nakuseza jila mukachi. VaIsalele jino vatambukile hamavu akuma mukachi kajimbango jameya.

Maswalale jaFwalo vahangasanyine lika vaIsalele nakungenge yakalungalwiji. Ngocho Yehova aluwanganyishile maswalale jaFwalo. Tufumbo twamatemba avo twaputukile kusokojoka. Maswalele vaputukile kutambakana nakwamba ngwavo: ‘Tukindulukenu. Yehova ali nakuvashila jita.’

Yehova alwezele Mose ngwenyi: ‘Olola livoko lyove hakalungalwiji.’ Hahaze vene meya afwikile maswalale javaEjipitu. Fwalo namaswalale jenyi vosena vafwile. Kakwapwile mutu numba umwe ayovokeleko.

Liyongomena lyavatu vaze vapwile musali yakalungalwiji vaputukile kwalisa Kalunga nakumwimbila mwaso ngwavo: “Nangwimbila Yehova mwaso mwomwo ikiye nazezuka chikuma helu. Kavalu namuka-kumutambukisa navambili mukalungalwiji.” Vatu vapwile nakwimba, kaha mapwevo vapwile nakukina nakwimba tungoma. Vatu vosena vawahililile chikuma mwomwo vavasokwele muundungo.