Mulifuchi lyaEjipitu, tanga yaYakova vayivulukilenga ngwavo vaIsalele. Omu afwile Yakova naYosefwe, Fwalo weka aputukile kuyula. Ou mwangana evwile woma vaIsalele mwomwo vapwile nangolo kuhambakana vaEjipitu. Shikaho, ou Fwalo engishile vaIsalele muundungo. Avashinjililile kuzata milimo yakufwatula tumenga, namilimo yeka yamumande. Omu vaEjipitu vashinjilililenga vaIsalele vazate chikuma milimo, vakiko vapwile nakuvulilako lika. Hakuwana nge Fwalo kasakile vatu kana vavuleko, ngocho ahakileko lushimbi lwakujiha vana vamalunga navasema vaIsalele. Achishinganyeke omu vaIsalele valizakaminyine hakwivwa mazu kana.

Pwevo umwe wakaIsalele walijina lyaYokevete, apwile nakemba walunga wamwaza. Hakusaka kumukinga, ou pwevo ahakile mwanenyi mumutonga nakuusweka mumahongo aKalwiji Nyile. Ou kemba apwile nayayenyi wapwevo walijina lyaMilyame uze atwaminenga kwakamwihi nauze mutonga vahakilemo songo yenyi mangana amone vyuma navisoloka.

Kaha mwanaFwalo wapwevo ejile kukalwiji nakusana, ngocho amwene mutonga mumahongo.  Mumutonga kana awanyinemo kemba ali nakulila, kaha amwivwililile keke. Milyame amuhulishile ngwenyi: ‘Uli nakusaka nguyenga nakukusanyikila pwevo mwakulelela ou kemba tahi?’ Omu mwanaFwalo etavishile Milyame ayenga, hahaze vene ayile nakusanyika naye Yokevete. Kaha mwanaFwalo ambile kuli Yokevete ngwenyi: ‘Mbata ou kemba ukanguleleleyo, nangukakufweta.’

Omu alingile mwana nakolo lyehi, Yokevete ambachile uze mwana nakumutwala kuli mwanaFwalo wapwevo, amumbachile nakupwa mwanenyi kaha ikiye amulukile ngwenyi Mose. Ngocho Mose akolele nakupwa chilolo, kaha apwile nalisesa havyuma vyosena vize asakile. Chipwe ngocho, Mose kavulyamine Yehovako. Atachikijile ngwenyi apwile kaIsalele keshi kaEjipituko. Kaha asakwile kuzachila Yehova.

Omu Mose apwile namyaka yakusemuka 40, apwile namuchima wakufwila kukafwa vaIsalele. Omu amwene kaEjipitu mwaveta kaIsalele, Mose avetele uze kaEjipitu nakumujiha, kaha amuvumbikile muusekeseke. Jino omu Fwalo atachikijile chuma kana, asakile kujiha Mose. Oloze Mose achinyine nakuya kulifuchi lyaMichane. Kaha Yehova atwalileho lika kumuzakama.