Mose atwaminenga mulifuchi lyaMichane hamyaka 40. Ambachile pwevo nakusema vana. Likumbi limwe omu apwile nakufunga mikoko, kwakamwihi naPili yaShinayi amwene chuma chakukomwesa. Chiputa chapwile nakakahya oloze kachapwile nakuwemako. Omu Mose ayile kuze kuchiputa akamone ovyo vyalingishile chize chiputa chihone kuwema, evwile lizu muze muchiputa ngwalyo: ‘Ove Mose! Kanda uswenya mwakamwihi chikumako. Zula mendelo [sapato] mwomwo oho unemana hajila.’ Yehova ikiye apwile nakuhanjika kuhichila muli kangelo.

Mose evwile woma, kaha alifwikile kumeso enyi. Kaha evwile lizu ngwalyo: ‘Ngunamono omu vali nakuyanda vaIsalele. Ngocho, nanguvasokola mumavoko avaEjipitu nakuvatwala mulifuchi lyamwaza. Shikaho, yove nautetekela vatu jami hakuvafumisa muEjipitu.’ Uno kaweshi nakushinganyeka nge Mose alikomokelele hakwivwa mazu kanako tahi?

Jino Mose ahulishile ngwenyi: ‘Uno vatu nangukavakumbulula ngachilihi nge navakanguhulisa ngwavo iya nakutumu?’ Kalunga amukumbulwile ngwenyi: ‘Kavalweze ngwove Yehova, Kalunga kaApalahama, Kalunga kaIsaka, Kalunga kaYakova nangutumu kuli enu.’ Mose ambile ngwenyi: ‘Uno nangukalinga ngachilihi nge vatu kaveshi kukangwivwililako?’ Yehova ahanyine Mose chinjikizo chakusolola nge mwakamukafwa. Yehova alwezele Mose ambile mbwechi yenyi hamavu. Kaha yize mbwechi yalumukile nakupwa linoka. Kaha omu Mose akwachile uze linoka kumukila, alumukile nakupwa cheka mbwechi. Yehova ambile ngwenyi: ‘Nge mukalinga chuma kanechi, kaha vatu navakatachikiza ngwavo yami ngunakutumu.’

Kufumaho, Mose ambile ngwenyi: ‘Ami kangwatachikiza kuhanjika nakulamuna lilimiko.’ Yehova amulwezele ngwenyi: ‘Nangukulweza vyuma watela kuhanjika, kaha nawa nangulweza ndumbwove Alone mangana akukafweko.’ Omu Mose atachikijile ngwenyi Yehova mwapwa naikiye, Mose ambachile puwenyi navana venyi nakukinduluka kuEjipitu.