Mulifuchi lyaUze, mwapwile lunga alemeselenga Yehova. Lijina lyenyi ikiye Yopa. Apwile naluheto lwaluvulu natanga yayinene. Apwile nawa walikoji kaha akafwilenga vatu vakuhutwa, navatuliwe, navana vavanginga. Hakuwana nge Yopa alingilenga vyuma vyakwoloka, uno echi chalumbunwine nge katelelele kumona ukaluko tahi?

Jino Satana Liyavolo apwile nakunyingilila Yopa, oloze ikiye katachikijile chuma kanako. Ngocho Yehova ambile kuli Satana ngwenyi: ‘Unamunyingilila ngamba yami Yopa tahi? Mwomwo kakweshi mutu wakufwana nge ikiye hamavuko. Eji kungwivwililanga, kaha eji kulinganga vyuma vyakwoloka.’ Ngocho Satana amukumbulwile ngwenyi: ‘Muchano vene Yopa eji kukwivwililanga mwomwo weji kumukinganga nakumukisula, kaha nawa unamuhane mavu navimuna. Mutambule vyuma vyosena tutale numba nge mwakulemesa.’ Yehova ambile ngwenyi: ‘Unahase tuhu kumweseka, oloze kanda kumujihako.’ Mwomwo ika Yehova etavishilile Satana eseke Yopa? Mwomwo atachikijile ngwenyi Yopa mwomika.

Satana aputukile kweseka Yopa hakumunehela vyeseko vyakulisezaseza. Chatete atumine vaSheva vezenga nakwiva vimuna jaYopa. Kutwala muze, kwejile kakahya kaze kajihile mikoko jaYopa. Kwejile nawa lizavu lyavaKalateya nakwiva vangamela. Vangamba jaYopa vaze vafungilenga vimuna jenyi navakiko vavajihile. Kufumaho, kwejile jino cheseko chachinene. Omu vana vaYopa vosena vapwile nakulinga chiwanyino, zuvo yavashiukilile kaha vafwile. Numba tuhu vyuma vyosena evi vyevwishile Yopa kupihya chikuma, oloze kalitwaminyinyine kulemesa Yehovako.

Satana asakile kuyanjisa chikuma Yopa, ngocho amuvetele namusongo  wamahute mujimba wosena. Chikupu vene Yopa evwile kukola chikuma. Katachikijile ovyo vyamulingishile ahite muukalu kanako. Chipwe ngocho, atwalilileho lika kulemesa Yehova. Kalunga evwililile kuwaha Yopa hakumona kulonga chenyi.

Kutwala muze, Satana atumine malunga vatatu mangana veseke Yopa. Vamulwezele ngwavo: ‘Atela walinganga shili nakuyisweka, shikaho Kalunga ali nakukuzangamisa.’ Yopa ambile ngwenyi: ‘Nevi ngunapihisa vyauchi.’ Oloze aputukile kushinganyeka ngwenyi Yehova ikiye ali nakumunehela ou ukalu, kaha nawa ngwenyi Kalunga namwechelela ayande.

Mukweze umwe walunga walijina lyaElihu evwililile kuvyuma vapwile nakushimutwila. Ngocho avalwezele ngwenyi: ‘Vyuma munahanjika enu muvosena vyamakuli. Yehova atachikiza vyuma vyosena kuhambakana etu vatu. Keshi kuhasa kulinga vyuma vyavipiko. Eji kumonanga vyuma vyosena nakukafwa vaze veji kumonanga ukalu.’

Yehova ambile kuli Yopa ngwenyi: ‘Uno wapwile kulihi omu ngwatengele melu namavu? Mwomwo ika unahanjikila ngwove kangweshi kanawako? Unahanjika tuhu ngocho, oloze kawatachikijile ovyo vyeji kulingisanga vyuma vimwe visolokeko.’ Yopa etavilile vyuma alimbenjele, kaha ambile ngwenyi: ‘Ngwahanjikanga mwakuhenga. Ngwakwivwilenga kaha, oloze ngunakutachikiza jino kanawa. Kakweshi vyuma vyavikalu kuli ove kulingako, shikaho ngukonekeleko havyuma ngwahanjikanga.’

Omu vyeseko vyakumine, Yehova alingishile Yopa apwenga cheka wakulikangula kumujimba nakumuhana vyuma vyavivulu kuhambakana vize apwile hakavanga. Yopa ayoyele myaka yayivulu nakupwa wakuwahilila mukuyoya chenyi. Yehova akiswile Yopa mwomwo amwivwilililenga nahalwola apwile nakuhita muvyeseko. Uno nayove musaka kupwa ngana mwaYopa hakutwalaho lika kulemesa Yehova chamokomoko navyeseko muhitamo tahi?