Yosefwe apwile mwanaYakova. Vayaya jenyi vatachikijile ngwavo Yosefwe vamuzangile chikuma kuli sevo kuhambakana vakiko. Uno vayaya jenyi vevwile ngachilihi hakumuzanga chikuma kuli sevo? Vevwile lwiso nakumujinda. Omu Yosefwe alotelenga vilota, alwezelenga vayaya jenyi. Kaha vilota kana vyavalingishile vashinganyeke ngwavo likumbi limwe navakalifukula kuli ikiye. Ngocho vamujinjile chikuma.

Likumbi limwe, vayaya jenyi vapwile nakufunga mikoko kwakamwihi nanganda yaShekeme. Kaha Yakova atumine Yosefwe mangana akatale vayaya jenyi numba nge vali kanawa. Jino omu vamumwene hahasuku ali nakwiza, vambile ngwavo: ‘Muka-kulota vilota uze mweza. Tumujihenu.’ Omu ahetele vamukwachile nakumumbila muwina wausuku. Oloze yayenyi Yuta ambile ngwenyi: ‘Kanda natumujihako. Tumulanjisenu akapwe ndungo.’ Ngocho valanjishile Yosefwe najimbongo japalata 20 kuli vaIshimele vaze vapwile nakuya kuEjipitu.

Vayaya jaYosefwe vambachile chikuto [chikovelo] chenyi nakuchitupika mumanyinga apembe. Kufumaho vachitwalile kuli sevo nakwamba ngwavo: ‘Kutala echi chikovelo chamwanove tahi?’ Yakova ashinganyekele ngwenyi mwanenyi Yosefwe vanamujihi kuli chisuma. Ngocho alishonene chikuma, kaha akanyine nakumuvendejeka.

Kuheta muEjipitu Yosefwe vamulanjishile kuli Potefwale uze apwile chilolo wamulemu. Oloze Yehova azakaminenga Yosefwe. Potefwale amwene ngwenyi Yosefwe azachilenga kanawa milimo, kaha chamulingishile amufwelele chikuma. Kutwala muze Potefwale atongwele Yosefwe kupwa muka-kulama vyuma vyosena.

Pwevo lyaPotefwale amwene ngwenyi Yosefwe wamwaza chikuma, kaha nawa wakujikiza. Ngocho hakumbi hakumbi amulwezelenga ngwenyi twaya tulisavale. Vyuma muka alingile Yosefwe? Akanyinenga  nakwamba ngwenyi: ‘Nduma! Chuma kana chakuhenga. Kaka yami angufwelela chikuma, kaha yove nawa upwevo lyenyi, shikaho, nge nangulisavala nayove nangulinga shili kuli Kalunga.’

Likumbi limwe pwevo lyaPotefwale ashinjilile Yosefwe mangana valisavale. Ngocho akwachile kulihina lyaYosefwe, oloze Yosefwe achinyine. Omu Potefwale ejile kuzuvo yenyi, pwevo lyenyi amulwezele ngwenyi Yosefwe angupikanga. Ou pwevo kapwile nakuhanjika muchanoko. Potefwale apihililile chikuma, ngocho akwachile Yosefwe nakumutwala mukamenga. Chipwe ngocho, Yehova kavulyamine Yosefweko.