VaIsalele vafumine kuPili yaShinai nakutambuka mupambo yaPalane nakuya kuchihela vavuluka ngwavo Kateshe. Omu vahetele kuze, Yehova alwezele Mose ngwenyi: ‘Tuma malunga 12 kufuma kumiyachi yavaIsalele mangana vayenga nakusondwesa lifuchi lyaKanane lize nanguhana vaIsalele.’ Ngocho Mose asakwile malunga 12 nakuvalweza ngwenyi: ‘Yenu mulifuchi lyaKanane, mangana mukamone nge lifuchi kana lyawilo, lyamwaza kulima. Kakekesenu vatu kana mumone numba nge vatwama najingolo nyi chiku, kaha nawa nge veji kutwamanga mujimbalaka nyi mujinganda.’ Hali vaze vandoji 12 vayile mulifuchi lyaKanane hapwile Yoshuwa naKaleve.

Omu mwahichile makumbi 40, vaze vandoji vakindulukile oku vanambate mihako yajikuyu, najiloma, namivinyo. Vaze vandoji valwezele Mose ngwavo: ‘Lifuchi kana lyamwaza, oloze vatu vatwamamo vajingolo, kaha nawa jinganda javo jatwama najikembwe jajisuku.’ Oloze Kaleve ambile ngwenyi: ‘Tunahase kuvafungulula. Tuyenu oholyapwa vene ngana.’ Uno unatachikiza ovyo vyalingishile Kaleve kuhanjika ngocho tahi? Mwomwo ikiye naYoshuwa vafwelelele Yehova. Oloze vaze vandoji 10 vambile ngwavo: ‘Nduma! Mwomwo vatu vamulifuchi kana vakutaluka. Etu twasolokanga nge tuvambimba kuli vakiko.’

Mujimbu kana wevwishile vaIsalele woma. Ngocho vaputukile kuyayavala nakuhanjika mwavomwavo ngwavo: ‘Tusakulenu mutu weka uze mwatutwaminyina nakutukindulwisa muEjipitu. Mwomwo ikaze natuyila mulifuchi kana mangana vakatujihilemo?’ Ngocho Yoshuwa  naKaleve vambile ngwavo: ‘Kanda namulikanga kuli Yehovako, kaha nawa kanda namwivwa womako. Yehova mwatukinga.’ Chipwe ngocho, vaIsalele kavevwililileko. Vasakile kujiha Yoshuwa naKaleve.

Kaha vyuma muka alingile Yehova? Alwezele Mose ngwenyi: ‘Numba tuhu ngunalingila vaIsalele vyuma vyavivulu, oloze vakiko vachili lika nakulikanga kuli ami. Shikaho navatwama mupambo hamyaka 40, nakufwila vene muze. Kuvanga kaha vana vavo, naYoshuwa naKaleve vakiko navakatwama mulifuchi ngunashiki kuvahana.’