Omu vaIsalele vapwile lika mupambo, Kola, naNdatane, naAvilame navatu veka 250 valikangile kuli Mose. Vambile kuli ikiye ngwavo: ‘Jinatuhu katweshi nakumisakako! Mwomwo ika unakusakila kutwalaho lika kupwa twamina yetu naAlone nawa kupwa kapilishitu wakulitulaho? Yehova ali nayetu tuvosena keshi yove naAlone kahako.’ Chikupu vene mazu vahanjikile evwishile Yehova kupihya. Ngocho, amwene chuma kana kupwa hikulikanga kuli ikiye.

Mose alwezele Kola navatu jenyi ngwenyi: ‘Mukeze hamene kutavanaku, kaha mukambate tumalonga twakukwachila kakahya, navyuma vyalivumba lyamwaza. Yehova mwakasolola mutu uze nasakula.’

Likumbi lyakavangijileho, Kola namalunga 250 vayile kutavanaku mangana vakaliwane naMose. Kahomu vahetele kutavanaku, vochele vyuma vyalivumba lyamwaza, mulimo uze vazachilenga kaha vapilishitu keshi kala mutuko. Ngocho, Yehova alwezele Mose naAlone ngwenyi: ‘Handukenu kuli Kola navatu jenyi.’

Numba tuhu Kola ayile kutavanaku nakuliwana naMose, oloze Ndatane, naAvilame najitanga javo vakanyine kuyako. Yehova alwezele vaIsalele vafume kujimbalaka jaKola, naNdatane naAvilame. Hahaze vene, vaIsalele vahandunukileko. Kaha Ndatane naAvilame najitanga javo valovokele nakwimana haweluka  wajimbalaka javo. Hahaze vene mavu apulikile nakuvamina. Kaha hatavanaku hejile kakahya nakwocha Kola navaze malunga 250.

Yehova alwezele Mose ngwenyi: ‘Tambula mbwechi yimwe yimwe kuli twamina wamuyachi himuyachi wavaIsalele nakusonekaho lijina lyatwamina kana. Oloze hambwechi yakumuyachi wavaLevi, sonekaho lijina lyaAlone. Ukajihake mutavanaku, kaha mbwechi yamutu uze nangusakula nayisoka jitemo.’

Likumbi lyakavangijileho Mose anehele jimbwechi josena nakujilwekesa vatwamina vamiyachi yavaIsalele. Kaha mbwechi yaAlone yasokele jitemo nakwima mamonde akuhya lyehi. Echi chapwile chinjikizo chakusolola nge Yehova asakwile Alone kupwa kapilishitu wakulitulaho.