VaIsalele vapwile mupambo hamyaka kafwe 40. Vafungulwile jinganda jangolo jajivulu. Omu vaIsalele vapwile muChinema chaMowave, kumututuko waKalwiji Yotau, lwola jino lwahetele lwakwingila muLifuchi lyaLushiko. Echi chevwishile woma Mbalaka mwangana wavaMowave mwomwo ashinganyekele ngwenyi navamutambula lifuchi lyenyi. Ngocho, asanyikile lunga walijina lyaMbalame mangana ezenga kuMowave nakwangula vaIsalele.

Oloze Yehova alwezele Mbalame ngwenyi: ‘Kawatela kwangula vaIsaleleko.’ Shikaho, Mbalame akanyine kuyako. Ngocho, mwangana Mbalaka amusanyikile kamuchivali nakumushika ngwenyi mwamuhana vyeshovyo vyuma mwasaka. Oloze Mbalame akanyine lika. Ngocho, Kalunga amulwezele ngwenyi: ‘Yako tuhu. Oloze ukahanjike kaha mazu aze nangukakulweza.’

Mbalame anyinyine hachimbulu chenyi nakuya kuMowave. Ashinganyekele kuya nakwangula vaIsalele numba tuhu Yehova amukanyishile kulinga chuma kana. Ngocho kangelo kaYehova asolokele kuli ikiye mapapa katatu. Mbalame kamwene uze kangelo emanyine mujilako, oloze chimbulu chenyi amumwene. Chatete uze chimbulu chenyi afumine mujila nakuya mumusenge. Chamuchivali, uze chimbulu achinyinyine kukembwe yamalolwa kuze akashindakanyine lihinji lyaMbalame kumbango. Chamakumishilo, uze chimbulu autamine hakachi kajila. Omu chimbulu apwile nakupindasana ngana, Mbalame amuvetelenga lika namutondo.

Omu amuvetele kamuchitatu, Yehova alingishile uze chimbulu ahanjike. Chimbulu ahulishile Mbalame ngwenyi: ‘Mwomwo ika uli nakunguvetela ngana?’ Kaha Mbalame akumbulwile ngwenyi: ‘Mwomwo unanguhulamisa. Nge ngwapwanga napoko yamukwale kachi ngunakujihi.’ Kaha uze chimbulu ambile ngwenyi: ‘Unatambukilanga hali yami hamyaka yayivulu. Uno ngwakulingaho lyehi ngana tahi?’

Yehova amwenesele Mbalame kangelo. Kaha kangelo ambile ngwenyi: ‘Yehova akuhuhumunanga ngwenyi, kanda ukangula vaIsaleleko.’ Mbalame akumbulwile ngwenyi: ‘Ngwalinganga shili. Shikaho,  nangukinduluka kwimbo.’ Oloze uze kangelo ambile ngwenyi: ‘Yako tuhu, oloze ukahanjika kaha mazu aze mwakakulweza Yehova.’

Kutala Mbalame alinangwile kuvyuma vyamusolokelele tahi? Nduma. Kutwala muze, Mbalame asakile kwangula vaIsalele mapapa katatu, oloze Yehova amulingishile avakisule. Ngocho, vaIsalele valukukile Mowave kaha Mbalame vamujihile. Uno chapwile chakwoloka Mbalame kukana kwivwilila Yehova tahi?