Yehova alwezele Mose ngwenyi: ‘Kanduka wizenga kuno kupili kuli ami. Nangusoneka jishimbi hamalwola akuya muuhanda nakukuhana.’ Mose akandukile hapili nakutwamaho makumbi 40 ufuku namusana. Omu apwile haze hapili, Yehova asonekele Jishimbi Likumi hamalolwa avali akuya muuhanda nakuwahana kuli Mose.

Kutwala muze, vaIsalele vashinganyekele ngwavo Mose nashimbula chikuma. Kaha valwezele Alone ngwavo: ‘Tunakusaka mutu wakututwaminyina. Tutengele kalunga.’ Alone ambile ngwenyi: ‘Nguhanenu ulu muli nawo.’ Vanehele ulu kaha auyengunwine nakutenga mwanangombe. Vatu vambile ngwavo: ‘Ou mwanangombe ikiye Kalunga ketu uze natutwaminyinanga kufuma muEjipitu.’ Kaha vaputukile kulemesa uze mwanangombe waulu nakulisamba. Uno chuma valingile chapwile chakuhenga tahi? Eyo, mwomwo vashikile Yehova ngwavo navalemesanga kaha ikiye. Chaluvinda, kavateselemo lushiko lwavoko.

 Yehova amwene vyuma vyapwile nakulingiwa kaha alwezele Mose ngwenyi: ‘Shikumuka uyenga kuli vatu. Vanalikange kuli ami nakulemesa kalunga wamakuli.’ Mose ashikumukile nakufuma haze hapili oku nambate aze malolwa akuya muuhanda.

Omu Mose apwile nakupandama kwakamwihi nachilombo, evwile vatu vanakwimba. Kaha avamwene vanakukina nakulifukula kuli uze mwanangombe. Mose apihililile chikuma, nakumbila aze malolwa hamavu kaha apazukile muvihanda. Hahaze vene achikile uze mwanangombe. Jino Mose ahulishile Alone ngwenyi: ‘Mwomwo ika wechelelanga vatu vakuhungumwise nakulinga chuma chaunyengwe ngana?’ Alone ambile ngwenyi: ‘E-mwata kanda upihililako. Nayove watachikiza omu vapwa vatu kana. Vasakanga kupwa nakalunga, kaha ngwayengununanga ulu wavo nakuvatungila ou mwanangombe unamono.’ Alone katelelele kulinga chuma kanako. Jino Mose akandukile cheka kupili mangana akalembelele Yehova akonekele vatu jenyi.

Yehova akonekelele kaha vaze vasakile kumwononoka. Unamono ovyo chapwililile chachilemu kuli vaIsalele kukavangiza vyuma avalwezelenga Mose tahi?