Omu mwahichile kafwe tukweji vavali kufuma haze valovokele muEjipitu, vaIsalele vahetele kuPili yaShinai kaha vatungile chilombo chavo. Yehova asanyikile Mose kupili, kaha amulwezele ngwenyi: ‘Ngunayovola vaIsalele. Nge navangwononoka nakulama jishimbi jami, kaha chikupu vene navapwa vatu jami vakulipwila.’ Mose afumine hapili nakuya nakulweza vaIsalele mazu osena aze ahanjikile Yehova. Uno vakwileko ngachilihi? Vambile ngwavo: ‘Natulinganga vyuma vyosena natulweze Yehova kulinga.’

Mose akandukile cheka kupili. Kaha Yehova amulwezele ngwenyi: ‘Namuhita makumbi atatu kaha nanguhanjika nayove. Huhumuna vatu ngwove kanda navakanduka kuPili yaShinaiko.’ Mose ashikumukile nakulweza vaIsalele mangana valizange kwivwilila kuvyuma mwahanjika Yehova.

Omu mwahichile makumbi atatu, vaIsalele vamwene miveso, nalivwi lilava hapili. Vevwile nawa mikalateta nachivumo chaluneta. Ngocho Yehova ejile haze hapili mumulangi wakakahya. VaIsalele vevwile woma nakulichikimina. Pili yosena yalinyikile chikuma, kaha vayifwikile kuwishi. Kaha chivumo chaluneta chatezukile chikuma. Ngocho Kalunga ambile ngwenyi: ‘Ami yami Yehova. Kanda namukalemesanga tulunga vekako.’

Mose afumine haze hapili, kaha Yehova amuhanyine jishimbi jize vatelelele kukavangiza vatu hakumulemesa navilinga vatelelele kupwa navyo. Mose asonekele jize jishimbi hamalolwa nakujitangila vaIsalele. Kaha vashikile Kalunga ngwavo: ‘Natulinganga vyuma vyosena vize natulweze Yehova kulinga.’ Chikupu vene vashikile Kalunga lushiko. Uno vahashile kulingamo tahi?