Omu Mose apwile haPili yaShinai Yehova amulwezele kutunga mbalaka yakulipwila vavulukile ngwavo tavanaku yize vaIsalele valemeselelengamo Kalunga. Kahomu vayilenga kuvihela vyeka vambachilenga eyi tavanaku.

Yehova alwezele Mose ngwenyi: ‘Lweza vatu vahane kala vyuma vali navyo mangana vavizachise kumulimo wakutunga tavanaku.’ Ngocho vaIsalele vahanyine ulu, napalata, naunengu, namalolwa andando yayinene, navimbilingwa. Vahanyine cheka wanda, namalambu atunyama navyuma vyeka vyavivulu. Vapwilenga namuchima wakuhana ngocho Mose avalwezele ngwenyi: ‘Kunahu! Vyuma tuli navyo vinavulu. Kanda kuneha vyekako.’

Malunga namapwevo vaze vapwile nauhashi wakutungatunga vazanyine chikuma mumulimo wakutunga tavanaku. Chikupu vene, Yehova avahanyine chinyingi chakuzata mulimo kana. Vamwe vapwile namulimo wakungundangunda nakutonga mahina. Veka vazachilenga milimo yakusonga malolwa, nakufula ulu, nakusonga maliva.

Vatu vatungile tavanaku kweseka nomu avalwezele Yehova. Vatongele mahina amwaza aze vahakile mutavanaku mangana vayihandunune muvihela vivali, chihela chimwe chapwile Chajila kaha chikwavo chapwile Chajila Chikuma. Muchihela Chajila Chikuma mwapwile chikasha chalushiko chize vatungile namitondo yamikesha naulu. Kaha muchihela Chajila mwapwile chitumbikilo chamanongo chaulu, namesa, nalijiko lyakulumbila vyuma vyalivumba lyamwaza. Kaha muchipango mwapwile mbashiya yakutunga naunengu, nalijiko lyakulumbila lyalinene. Chize chikasha chalushiko chakafwilenga vaIsalele vanuke lushiko vashikile Yehova lwakumwononokanga. Uno lushiko lwapwa luka? Lwapwa chivwasano chakulipwila.

 Yehova asakwile Alone navana venyi vazatenga hatavanaku mulimo waupilishitu. Vatelelele kulama kanawa tavanaku nakuhanyinangaho mawana kuli Yehova. Alone uze apwile kapilishitu wakulitulaho ikiye kaha vetavishile kwingila muchihela Chajila Chikuma. Ngocho, engililengamo kamwe mumwaka nakuhana wana washili yenyi, nashili yavaka-tanga yenyi navaIsalele vosena.

VaIsalele vakumishile mulimo wakutunga tavanaku omu mwahichile mwaka umwe kufuma haze valovokele muEjipitu, vapwile jino nachihela chakulemesela Yehova.

Yehova azalishile tavanaku naupahu wenyi kaha ahakile livwi helu lyatavanaku. Nge livwi lili hatavanaku kaha chapwile chinjikizo chakulweza vaIsalele nge vatela kutwama hachihela vapwile, oloze nge lize livwi linakatuka kaha vaIsalele navakiko vatelelele kukatuka nakuya. Ngocho, vambachilenga yize tavanaku nakukavangiza kweshokwo lyayilenga lize livwi.