Kapilishitu Wakulitulaho Eli, apwile navana vamalunga vavali vaze vazachilenga mulimo waupilishitu hatavanaku. Umwe apwile Hofwonyi mukwavo Fwinehase. Kavakavangijilenga jishimbi jaYehovako, kaha vayanjishilenga chikuma vatu. Omu vaIsalele vahanyinenga wana wakulumba kuli Yehova, Hofwonyi naFwinehase vasakwilenga nyama yamwaza kupwa yavo. Eli atachikijile vyuma valingilenga vana venyi, oloze kalingileho chuma numba chimweko. Uno Yehova echelelele vilinga kana vitwaleho lika tahi?

Numba tuhu Samwele apwile kanyike wamundende hali Hofwonyi naFwinehase, oloze ikiye kalondezezele vilinga vyavoko. Yehova evwililile kuwaha Samwele. Ufuku umwe omu Samwele asavalile, evwile mutu mwamusanyika. Hahaze vene ahindukile nakuya kuli Eli, nakwamba ngwenyi: ‘Yami uno nguneza mwane.’ Oloze Eli ambile ngwenyi: ‘Kangwakusanyikileko. Yako ukasavale.’ Ngocho, Samwele akindulukile nakusavala. Kaha evwile cheka mutu mwamusanyika kamuchivali. Oloze omu Samwele evwile navamusanyika kamuchitatu, Eli jino atachikijile ngwenyi Yehova ikiye ali nakusanyika Samwele. Ngocho alwezele Samwele ngwenyi, nge mwivwa cheka mutu mwakusanyika kaha watela kukumbulula ngwove: ‘Hanjika Yehova, ngamba yove, ali nakukwivwa.’

Omu Samwele ayile cheka nakusavala, evwile lizu nalimusanyika ngwalyo: ‘Ove Samwele, ove Samwele!’ Kaha ikiye akumbulwile ngwenyi:  ‘Hanjika, ngamba yove ali nakukwivwa.’ Kaha Yehova ambile ngwenyi: ‘Lweza Eli ngwove nangumuzangamisa natanga yenyi. Mwomwo natachikiza vyuma vanakulinga vana venyi hatavanaku, oloze navechelela vatwaleho lika kulinga vyuma vyavipi.’ Kahomu kwachele nachimene, Samwele asokolwele kuvikolo vyakutavanaku ngana muze alingilenga makumbi osena. Evwile woma kulweza Eli vyuma ahanjikile Yehova. Oloze Eli amusanyikile nakumuhulisa ngwenyi: ‘Ove mwanami, mujimbu muka akulwezanga Yehova? Ngulweze vyuma vyosena.’ Shikaho, Samwele amulwezele vyuma vyosena.

Omu Samwele akolele, Yehova atwalileho lika kupwa naikiye. VaIsalele vosena vatachikijile ngwavo Yehova nasakula Samwele apwenga kapolofweto kaha nawa muka-kuyula.