Omu vandoji javaIsalele vayile munganda yaYeliko, vatwaminenga muzuvo yapwevo walijina lyaLahave. Jino mwangana wamuYeliko atachikijile chuma kana, ngocho atumine maswalale vayenga kuzuvo yaLahave. Oloze ikiye aswekele vaze vandoji hamulungu wazuvo nakwonga maswalale vayenga. Kufumaho, alwezele vaze vandoji ngwenyi: ‘Nangumikafwa mwomwo ngunatachikiza ngwami Yehova ali kusali yenu kaha namufungulula lifuchi lino. Shikaho, ngushikenu ngwenu namukayovola vaka-tanga yami.’

Ngocho, vaze vandoji valwezele Lahave ngwavo: ‘Natulama lushiko elu ngwetu katweshi kukalemeka mutu numba umwe wakuzuvo yoveko.’ Kaha vambile cheka ngwavo: ‘Ukakase mukole uchila munjanena yove, kaha tanga yove yosena nayikayovoka.’

Kaha Lahave alowelele vaze vandoji munjanena kuzachisa mukole. Kaha vayile kujipili nakuswama hamakumbi atatu shimbu kanda vakindulukile kuli Yoshuwa. Jino vaIsalele vazaukile Kalwiji Yotau nakulizanga mangana vakatambule lifuchi. Yeliko ikiko yapwile nganda yatete kufungulula. Yehova avalwezele  vajinguluke nganda kana kamwe halikumbi hamakumbi 6. Jino halikumbi lyakusokesa 7 vayijingulukile mapapa 7. Kaha vapilishitu vembile jineta, ngocho maswalale vatambakanyine nalizu lyakukanguka. Jikembwe janganda jashiukile. Oloze zuvo yaLahave yize yapwile hakembwe kayashiukileko. Shikaho, Lahave natanga yenyi vayovokele mwomwo vafwelelele Yehova.