VaIsalele valitwaminyinyine cheka kuzachila Yehova nakuputuka kulemesa tulunga vamakuli. Kahomu vaAmone valukukile vaIsalele nakuputuka kulwa navo jita, vaze tulunga vamakuli kavahashile kuvakafwako. Ngocho vaIsalele vayanjile hamyaka yayivulu. Kutwala muze valwezele Yehova ngwavo: ‘Tunalingi shili. Tunakulembelela utuyovole kuli vaka-kole jetu.’ VaIsalele valitwaminyinyine kulemesa makombelo nakuputuka cheka kulemesa Yehova. Ngocho, Yehova kazangile kumona vatu jenyi navatwalaho lika kuyandako.

Yefweta uze apwile muka-kwasa jita wangolo vamusakwile mangana atwaminyine vaIsalele valwenga jita navaAmone. Kaha Yefweta alombele kuli Yehova ngwenyi: ‘Nge nautukafwa tufungulule vaka-kole jetu, kaha nangukushika ngwami omu nangukakinduluka kwimbo, nangukakuhana kala mutu uze mwakalivanga kulovoka muzuvo yami  nakungusesa.’ Ngocho, Yehova evwililile kukulomba chaYefweta kaha amukafwile afungulule vaka-kole javo.

Omu Yefweta akindulukile kwimbo, mutu wakavanga kulovoka muzuvo nakumusesa apwile mwanenyi umwe kaha lyamunwe. Omu alovokele apwile nakukina nakwimba kangoma. Uno Yefweta alingile ngachilihi? Anukile lushiko lwenyi nakwamba ngwenyi: ‘Mama lelo ove mwanami! Unangwivwisa chinyengo. Ngwashikanga Yehova lushiko. Hakusaka ngutesemo lushiko lwami, ngwatela kukutuma uyenga nakuzachila hatavanaku kuShilo.’ Kaha mwanenyi wapwevo ambile kuli ikiye ngwenyi: ‘Tata washikanga lyehi Yehova, ngocho tesamo lushiko lwove. Ngwitavise kaha nguyenga kujipili navakwetu mapwevo ngukatwameko tukweji vavali. Kufumaho jino nangukaya kutavanaku.’ Ngocho, uze mwanaYefweta wapwevo azachililenga hatavanaku nakashishi mukuyoya chenyi chosena. Kaha mwaka himwaka masepa jenyi vayilenga kuShilo nakushikama nenyi.