Yoshuwa atwaminyinyine vatu jaYehova hamyaka yayivulu, kaha afwile namyaka yakusemuka 110. Shimbu kanda Yoshuwa afwenga, vaIsalele valemeselenga lika Kalunga. Oloze omu Yoshuwa afwile, vaIsalele vaputukile kulemesa makombelo ngana muze valingilenga vaKanane. Hakuwana nge vaIsalele valitwaminyinyine kulemesa Yehova, ngocho alingishile mwangana wavaKanane Yavine akaluhwise chiyoyelo chavo. Kaha valombele Yehova avakafwe. Kutwala muze, Yehova ahanyine vaIsalele twamina wamuhya walijina lyaMbalake mangana avakafwe vakinduluke kuli Yehova.

Kapolofweto Ndevola asanyikile Mbalake mwomwo apwile namujimbu wakufuma kuli Yehova wakwamba ngwawo: ‘Yako ukambate malunga 10,000 mangana ukawane lizavu lyamaswalale jaYavine kumwanakalwiji Kishone mwomwo kuchihela kana kukiko mukafungulwila Shisela kapitau kamaswalale jaYavine.’ Ngocho Mbalake ambile kuli Ndevola ngwenyi: ‘Nanguya nge mwitavila kuya nayami hamwe.’ Kaha Ndevola ambile kuli ikiye ngwenyi: ‘Nanguya nove. Oloze ijiva ngwove keshi yove mujiha Shiselako. Mwomwo Yehova nambe ngwenyi, pwevo ikiye mwamujiha.’

Ndevola ayile hamwe naMbalake nalizavu lyamaswalale kuPili yaTavole mangana vakalizange vyakwasa jita. Omu Shisela evwile mujimbu kanou  akungulwile matemba enyi navaka-kwasa jita muchinema. Ngocho Ndevola ambile kuli Mbalake ngwenyi: ‘Likumbi lyalelo Yehova mwakukafwa ufungulule Shisela.’ Kufumaho, Mbalake ashikumukile kufuma kuPili yaTavole navaze malunga vaka-jita 10,000 mangana vakaliwane nalizavu lyaShisela lyangolo.

Yehova alingishile mwanakalwiji Kishone azale nameya. Ngocho matemba ajita aShisela akakachilile muulova. Kaha Shisela asulukile mulitemba nakuchina jimbushi. Shikaho Mbalake namaswalale jenyi vafungulwile maswalale jaShisela, oloze Shisela achinyine. Ayile nakuswama mumbalaka yapwevo walijina lyaYayele. Amuhanyine mavele mangana anwenga nakumufwika lipayi. Ou muka-kwasa jita azeyele chikuma ngocho ayile mutulo. Kaha Yayele alivembele nakumupapalila lumbambo kumutwe, ngocho afwile.

Kutwala muze, Mbalake ejile nakutonda Shisela, kaha Yayele alovokele mumbalaka nakwamba ngwenyi: ‘Ingila mumbalaka yami mangana umone ou lunga unakutonda.’ Omu Mbalake engilile awanyine Shisela nafu lyehi. Ngocho, Mbalake naNdevola valishile Yehova hakumwimbila mwaso wakusakwilila hakufungulula vaka-kole javo. Shikaho vaIsalele vatwaminenga mukuunda hamyaka 40 yakavangijileho.