Omu vaIsalele vavavulu vaputukile cheka kulemesa makombelo, Yehova etavishile vaFwilishite vavayule. Chipwe ngocho, kwapwile vaIsalele vamwe vaze vazangile chikuma Yehova. Hali vaIsalele kanava hapwile nalunga umwe walijina lyaManowa. Ikiye napuwenyi kavapwile namwanako. Likumbi limwe Yehova atumine kangelo kuli pwevo lyaManowa. Uze kangelo amulwezele ngwenyi: ‘Mukasema mwana walunga, uze mwakayovola vaIsalele mumavoko avaFwilishite kaha mwakapwa kaNajili.’ Uno vaNajili vapwile veya? Vapwile vangamba jaYehova vakulipwila. VaNajili kavavetavishile kuteula jikambu javoko.

Kutwala muze, mwanaManowa walunga asemukile, kaha vamulukile ngwavo Samasone. Omu Samasone akolele, Yehova amuhanyine ngolo chikuma kaha ahashile nakujiha ndumba namavoko enyi. Lwola lumwe nawa Samasone ajihile vaFwilishite 30 ukawenyi. Echi chalingishile vaFwilishite vamujinde chikuma nakufwila kumujiha. Likumbi limwe naufuku, Samasone asavalile munganda yaNgaza kaha vaFwilishite vamuswaminyinyine kuchikolo changanda kana mangana vamujihe nachimene. Kuheta mukachi kaufuku, Samasone ahindukile nakuya nakupatula mapito achikolo changanda nakulitwikawo havifwiji vyenyi swi nomu ahetele helu lyapili yapwile kwakamwihi nanganda yaHevelone.

Kutwala muze, vaFwilishite vayile kuli Ndelila pwevo lyaSamasone nakumulweza ngwavo: ‘Nge nautulweza oho hafuma ngolo jaSamasone, kaha natukuhana jimbongo jajivulu. Tunakusaka kumukwata nakumuhaka mukamenga.’ Ndelila etavile, mwomwo azangile chikuma jimbongo. Hakavanga, Samasone akanyine kumulweza oho hafumine ngolo jenyi. Oloze amushinjilililenga swi nomu Samasone amulwezele oho hafumine ngolo jenyi. Ngocho amulwezele ngwenyi: ‘Jikambu jami kanda ngujiteulengaho lyehi mwomwo ngwapwa ngukaNajili, shikaho nge jikambu jami navajiteula, kaha kangweshi kupwa cheka nangoloko.’ Chikupu vene Samasone alimbenjele hakumulweza hafumine ngolo jenyi. Nyi mweka?

 Hahaze vene, Ndelila ayile nakulweza vaFwilishite ngwenyi: ‘Ngunatachikiza jino hafuma ngolo jenyi!’ Kufumaho, Ndelila asavalikile tulo Samasone hamahinji enyi, nakulweza mutu ezenga nakumuteula jikambu jenyi. Kaha Ndelila atambakanyine nakwamba ngwenyi: ‘Samasone, vaFwilishite vaneza!’ Hahaze vene, Samasone ahindukile, oloze kapwile cheka nangoloko. Ngocho vaFwilishite vamukwachile nakumutuva meso, nakumuhaka mukamenga.

Likumbi limwe omu vaFwilishite vavavulu valikungulwilile mutembele yakalunga kavo Ndangone, vatambakanyine ngwavo: ‘Vanatuhane Samasone kuli kalunga ketu! Mulovolenu Samasone mangana ezenga nakutusehesa!’ Kaha vamwimikile mukachi kajipanda jivali oku vali nakumulangulula. Ngocho Samasone alombele kuli Yehova ngwenyi: ‘Ove Yehova, nguhane cheka ngolo jami.’ Halwola kana jikambu jenyi hijinasoko cheka. Kaha ashinjikile jipanda jatembele nangolo jenyi josena. Kufumaho, tembele yosena yashiukile nakujiha vatu vosena vapwilemo kuhakilako nayivene Samasone.