Hanyima yakutwaminyina vaIsalele hamyaka yayivulu, Mose apwile jino kwakamwihi nakufwa. Yehova amulwezele ngwenyi: ‘Keshi yove mukahetesa vaIsalele muLifuchi lyaLushikoko. Oloze nangukutalisa lifuchi kana.’ Jino Mose alombele Yehova mangana asakule twamina uze mwazakama vatu jenyi. Yehova ambile kuli ikiye ngwenyi: ‘Yako kuli Yoshuwa nakumulweza ngwove ikiye ngunasakula.’

Mose alwezele vaIsalele ngwenyi kalinwomu afwenga kaha Kalunga nasakula lyehi Yoshuwa mangana avatwaminyine muLifuchi lyaLushiko. Jino Mose alwezele Yoshuwa ngwenyi: ‘Kanda kwivwa womako. Yehova mwakukafwa.’ Kufumaho Mose ayile helu lyaPili yaNevo, kaha Yehova amulwekesele lifuchi lize ashikile Apalahama, naIsaka, naYakova. Mose afwile omu apwile namyaka yakusemuka 120.

Yehova alwezele Yoshuwa ngwenyi: ‘Zauka Kalwiji Yotau, nakwingila mulifuchi lyaKanane. Nangukukafwa ngana muze ngwakafwilenga Mose. Watela kutanganga Jishimbi jami hakumbi hakumbi. Kanda kwivwa womako. Pwako wakuhamuka. Yako ukalinge vyuma ngunakulweze kulinga.’

 Yoshuwa atumine vandoji vavali vakasondwese lifuchi lyaYeliko. Muchilongesa chinakavangizaho natulinangula vyavivulu kutalisa kuvyuma vyasolokele mulifuchi kana. Omu vakindulukile vaze vandoji vambulwile ngwavo, luno hilwola lwamwaza lwakwingila mulifuchi lyaKanane. Likumbi lyakavangijileho, Yoshuwa alwezele vaIsalele vosena valongejeke. Alwezele vapilishitu vaze vambachile chikasha chalushiko mangana valivange kulutwe kuKalwiji Yotau. Kalwiji kana azalile nameya. Oloze omu vapilishitu valyachile mukalwiji, kaha meya atepulukile. Vapilishitu vemanyine hakachi kakalwiji palanga nomu vaIsalele vazaukile. Uno unashinganyeka ngwove echi chakukomwesa chavanukishile vyuma alingile Yehova haKalungalwiji Uchila tahi?

Omu mwahichile myaka yayivulu, vaIsalele vengilile jino muLifuchi lyaLushiko. Vatungile jizuvo najinganda. Valiminenga mande amivinyo namatepa. Chikupu vene, lifuchi kana lyapwile lyamwaza lyakumbwambumuka mavele nauchi.