Mujimbu wakushiula nganda yaYeliko watandakanyine mulifuchi lyaKanane. Ngocho, vamyangana vamulifuchi kana valikungulwilile hamwe mangana valwenga jita navaIsalele. Oloze vaka-Ngiveyone vashinganyekele mwakuzangama. Vavwalile uvwalo wakupulika, nakuya kuli Yoshuwa nakumulweza ngwavo: ‘Tunafumu kulifuchi lyakwakusuku, tunevu mujimbu kutalisa kuli Yehova navyuma vyosena amilingilile omu mwapwile muEjipitu namuMowave. Shikaho, tufwelelesenu ngwenu kamweshi kukatulukukako, kaha natupwanga tuvangamba jenu.’

Yoshuwa avetavilile nakulikasa navo chivwasano chakuhona kuvalukuka. Kahomu mwahichile makumbi atatu, Yoshuwa evwile ngwavo vaze malunga kavafumine kulifuchi lyakwakusukuko, oloze vafumine vene mulifuchi lyaKanane. Ngocho, Yoshuwa ahulishile vaka-Ngiveyone ngwenyi: ‘Mwomwo ika mwatwongelanga?’ Kaha vakiko vamukumbulwile ngwavo: ‘Twevwanga woma! Tunatachikiza ngwetu Yehova Kalunga ali nakumyashila jita. Shikaho kanda kutujihako.’ Ngocho, Yoshuwa alamine lushiko lwenyi lwakuhona kuvanongesa.

Kufumaho, vamyangana vatanu vavaKanane namaswalale javo vejile nakwivwisa woma vaka-Ngiveyone mangana valwenga navo jita. Yoshuwa namaswalale jenyi vatambukile ufuku wosena nakuya  nakuvayovola. Lichako nachimene vaputukile kulwa jita. VaKanane vaputukile kuchina, kaha Yehova anokesele vula yayinene kweshokwo vachinyinyinenga. Jino Yoshuwa alombele Yehova mangana alingise likumbi limane ndundulu. Mwomwo ika Yoshuwa alombelele kuli Yehova alinge chuma kana, okunyi likumbi kanda limanengaho lyehi? Mwomwo Yoshuwa afwelelele Yehova. Shikaho, likumbi lyemanyine palanga nomu vaIsalele vafungulwile vaKanane namaswalale javo.