Omu Ndavichi ajihile Ngolyate, Mwangana Saulu amulingishile kupwa kapitau kamaswalale. Ndavichi afungulwilenga vaka-kole mujijita jajivulu, ngocho vamutachikijile chikuma kuvatu. Omu Ndavichi akindulukilenga kufuma kujita mapwevo vakinyinenga nakwimba myaso ngwavo: ‘Saulu najihi makombakaji, oloze Ndavichi najihi tununu natununu!’ Echi chalingishile Saulu aputuke kwivwila Ndavichi lwiso nakutonda kumujiha.

Ndavichi atachikijile kanawa mwakwimbila kalyalya. Likumbi limwe omu Ndavichi apwile nakwimbila Saulu kalyalya, ou mwangana ashile Ndavichi likunga. Oloze Ndavichi alipekelelyo, kaha lyakwachile hambango. Kufumaho, Saulu atondelenga jijila jakujihilamo Ndavichi mapapa kakavulu. Oloze, Ndavichi achinyine nakuya nakuswama mulikundu.

Kufumaho, Saulu ayile namaswalale 3,000 mangana vakatondetonde Ndavichi. Kutwala muze vakengilile kuwina wakusendeveka kuze aswamine Ndavichi navatu jenyi, kaha vatu jenyi vamuyevetelele ngwavo: ‘Luno lukiko lwola watela kujiha Saulu.’ Ngocho Ndavichi  alivembele nakuya kuli Saulu nakuvatula kalihina kuuvwalo wenyi, oloze Saulu katachikijileko. Kufumaho, Ndavichi evwile kupihya kumuchima mwomwo kasolwele kalemesa kumutu uze vatongwele kuli Yehova kupwa mwanganako. Ketavishile vatu jenyi vajihe Sauluko. Kaha atambakanyine Saulu nalizu lyakukanguka nakumulweza ngwenyi nge asakile kachi amujihile lyehi. Uno Saulu alumwine vishinganyeka vyenyi hali Ndavichi tahi?

Nduma. Saulu atwalileho lika kutondatonda Ndavichi. Ufuku umwe Ndavichi namwihya wenyi Avishai vayile kuchilombo chaSaulu, kaha vawanyine Avanele uze apwile muka-kulama mwangana nasavala tulo. Kaha Avishai ambile ngwenyi: ‘Luno lukiko lwola lwakumumanusula, mana ngumujihe!’ Oloze Ndavichi amulwezele ngwenyi: ‘Yehova ikiye mwakazangamisa Saulu. Tumbate kaha likunga lyenyi namulondo wenyi wameya tuyenga.’

Kufumaho, Ndavichi anyinyine helu lyapili yize yapwile kwakamwihi nachilombo chaSaulu. Kaha atambakanyine ngwenyi: ‘Avanele, mwomwo ika unahonena kukinga mwangana wove? Uno mulondo waSaulu nalikunga lyenyi vili kulihi?’ Hakuwana nge Saulu atachikijile lizu lyaNdavichi kaha ambile ngwenyi: ‘Nge wasakanga kungujiha, kachi unangujihi, oloze ove kawalingile ngochoko. Ngunatachikiza ngwami ove yove mukapwa mwangana wavaIsalele wamuchivali.’ Kufumaho, Saulu akindulukile kunganda yenyi. Oloze, keshi nge vatu vosena mutanga yaSaulu vajinjile Ndavichiko.